“Aston Villa” “PSJ”ning 18 yoshli futbolchisi uchun 55 million yevro to‘laydi — The Athletic

"Aston Villa" 18 yoshli "PSJ" futbolchisi uchun 55 million yevro to‘laydi — The Athletic

Angliyaning "Aston Villa" futbol klubi Fransiyaning "PSJ" jamoasi bilan 18 yoshli senegallik vinger Ibrohim Mbayening transferi borasida kelishuvga erishdi.

The Athletic nashrining ma'lumotlariga ko‘ra, ingliz klubi futbolchi uchun 55 million yevro miqdorida to‘lov amalga oshiradi. Hozirda tomonlar transferni rasmiylashtirish va tegishli hujjatlarni tayyorlash ishlari bilan band.

Mbaye "PSJ" akademiyasining tarbiyalanuvchisi bo‘lib, u klub tizimiga 2018-yilda kelib qo‘shilgan. Senegallik futbolchi parijliklarning asosiy jamoasida 2024-yilda, 16 yoshida debyut qilgan. U "PSJ" safida jami 42 ta o‘yinda maydonga tushib, 4 ta gol urgan va 4 ta golli uzatmani amalga oshirgan.

Mbaye 2025/26-yilgi mavsumda barcha musobaqalarda 29 ta uchrashuvda ishtirok etib, 3 ta gol va 2 ta assist qayd etgan.

2026-yilning yozida vinger Senegal terma jamoasi tarkibida Jahon chempionatida ham qatnashdi. Mbaye turnirda 4 ta o‘yinda maydonga tushib, guruh bosqichida Fransiya darvozasiga gol kiritdi. Senegal terma jamoasi esa 1/16 final bosqichida Belgiyaga qo‘shimcha vaqtda 2:3 hisobida mag‘lub bo‘lib, musobaqani tark etdi.