“Armanistonni KXSHTdan chiqarib yubormoqchi bo‘lishsa, marhamat” — Pashinyan
“Armanistonni KXSHTdan chiqarib yubormoqchi bo‘lishsa, marhamat” — Pashinyan
Armaniston bosh vaziri Nikol Pashinyan jurnalistlar bilan suhbatda mamlakatining KXSHT (Kollektiv xavfsizlik shartnomasi tashkiloti)dagi a’zoligi hamda Rossiya harbiy bazasi borasida o‘z fikrlarini bildirdi.
**Pashinyan KXSHT haqida**
Pashinyan Armanistonni KXSHTdan chiqarish bilan qo‘rqitish kerak emasligini aytdi. U bu haqda shunday dedi:
“Agar ular Armanistonni KXSHTdan chiqarib yubormoqchi bo‘lsa, marhamat, chiqarsin. Agar chiqarishni xohlashmasa, chiqarishmasin”.
Bosh vazir bu holatni armanlarning “Kikosning o‘limi” ertagiga qiyosladi. Ushbu ertakda bir oila hali tug‘ilmagan bolaning ertaga daraxtdan yiqilib o‘lishini tasavvur qilib, oldindan aza tutadi. Pashinyan Armanistondan ham xuddi shunday asossiz xavotir kutilayotganini ta’kidladi.
**Rossiya harbiy bazasi masalasi**
Rossiya harbiy bazasi haqida gapirar ekan, Pashinyan Armaniston bu bazani olib chiqib ketish masalasini hech qachon ko‘tarmaganini aytdi. Uning so‘zlariga ko‘ra, bu masalani o‘rtaga Rossiyaning o‘zi tashlagan.
Uning ta’kidlashicha, bu baza Armaniston xavfsizligi uchun hayotiy ahamiyatga ega emas.
“Ular bazani olib chiqib ketmoqchi bo‘lsa, marhamat, ertagayoq olib ketishsin. Agar qolmoqchi bo‘lishsa, shartlarni muhokama qilishga tayyormiz”, dedi Pashinyan.
Bosh vazir bunday pozitsiyani 2022-yil sentyabr oyidagi voqealar bilan izohladi. U avval bu mavzu Armaniston va Rossiya rasmiylari tomonidan ochiq muhokama qilinmaganini ham qo‘shimcha qildi.
Ma’lumot uchun, Gumri va Yerevanda joylashgan Rossiyaning 102-harbiy bazasi shartnoma asosida tashkil etilgan. 2010-yilda ushbu kelishuv 2044-yilgacha uzaytirilgan. Baza Armanistonga tashqaridan bo‘ladigan tahdidlarni qaytarishi kerak.
**Moskva munosabati**
Sentyabr oyida Rossiya Prezidenti Vladimir Putin bazaning qolishi yoki ko‘chirilishi Yerevan qaroriga bog‘liqligini aytgan edi.
“Biz hech kimni hech narsaga majburlamaymiz. Agar Armaniston xalqi Rossiya harbiy ishtirokini xohlasa, qolamiz. Agar kerak emas deb topsa, ertagayoq chiqib ketamiz”, degan edi Putin.
May oyida Rossiya Xavfsizlik kengashi kotibi Sergey Shoygu bazani yopish uchun hech qanday asos ko‘rmayotganini bildirgandi. 2026-yil boshida esa Pashinyanning o‘zi ham, Armaniston parlamenti sobiq spikeri Alen Simonyan ham 102-harbiy bazani chiqarib yuborish rejasi yo‘qligini va Yerevan Moskva bilan yaqin hamkor ekanini ta’kidlagan edi.
Avvalroq Rossiya ta’mirlash bahonasida Armanistonga gaz eksportini to‘xtatgan edi. Bu holat ikki mamlakat o‘rtasidagi siyosiy va iqtisodiy munosabatlar yomonlashgan bir paytda yuzaga keldi.