Armanistonda oltin sirğalar va Rimning ilk imperatoriga boğliq tanga topildi
Armanistondagi qadimiy Metsamorda arxeologlar oltin sirğalar, bronza xanjar va Rimning birinçi imperatori Oktavian Avgust bilan boğliq tangani topdi. Eʼlon qilingan maʼlumotlarga köra, topilmalar turli davrlarga - sönggi bronza davri, temir davri va antik davrga mansub.
Armanistonda oltin sirg‘alar va Rimning ilk imperatoriga bog‘liq tanga topildi
Armanistonning Tarixiy muhit va tarixiy-madaniy muzey-qo‘riqxonalarni muhofaza qilish xizmati 27-oktabr kuni Metsamordagi yangi arxeologik topilmalar haqida ma’lum qildi. Mutaxassislar «Metsamor» tarixiy-arxeologik muzey-qo‘riqxonasiga tutash hududda qazishmalar olib bormoqda.
Topilmalar orasida oltin sirg‘alar, tugma, bronza xanjar va Oktavian Avgust bilan bog‘lanayotgan tanga bor.
Fotosuratlarda halqasi tutashmagan, bo‘rtma naqshlar bilan bezatilgan yirik oltin sirg‘alarni ko‘rish mumkin. Suratlardan birida taqinchoq tadqiqotchining kaftida ko‘rsatilgan, boshqasida esa sirg‘alar topilmalarni saqlash uchun mo‘ljallangan paketlarga joylangan.
Alohida suratda dumaloq tugma aks etgan. Qazishma joyida olingan yana bir kadrda tuproq orasida yotgan cho‘zinchoq tig‘ ko‘rinadi. Uning yonida sirtini yashilsimon qatlam — patina qoplagan mayda buyumlar ham bor.
Tangada erkak kishining yon tomondan tushirilgan tasviri va chetlari bo‘ylab yozuvni ko‘rish mumkin. Xizmat xabarida ushbu tanga Rimning birinchi imperatori Oktavian Avgust bilan bog‘langan.
Britaniya muzeyi ma’lumotlariga ko‘ra, Oktavian miloddan avvalgi 27 yilda Avgust nomini qabul qilgan va milodiy 14 yilda vafot etgan. Biroq Metsamordan topilgan tanganing nominali, qaysi zarbxonada tayyorlangani va aniq zarb qilingan yili hozircha ma’lum qilinmagan. Taqinchoqlar va xanjarning har biri aynan qaysi davrga mansubligi ham alohida ochiqlanmagan.
Metsamor Araks vodiysida, Taronik qishlog‘i yaqinida, Yerevandan taxminan 35 kilometr janubi-g‘arbda joylashgan. Uning arkasi tabiiy qoyali tepalik ustida qurilgan. Tepalikni o‘rab turgan mustahkam tosh devorlar uning shaklini takrorlaydi. Shimol tomonda esa quyi shahar joylashgan.
Yodgorlikning bunday tuzilishi ekspeditsiya ishtirokchilarining 2013–2021-yillardagi ishlariga bag‘ishlangan ilmiy hisobotida tasvirlangan.
Metsamordagi tadqiqotlar hozirgi topilmalardan ancha oldin boshlangan. Armaniston va Polsha arxeologlarining qo‘shma loyihasi 2013-yilda yo‘lga qo‘yilgan. Varshava universiteti ma’lumotlariga ko‘ra, dastlabki uch qazishma mavsumidayoq olimlar qariyb uch ming yillik davrni — miloddan avvalgi III ming yillikdan milodiy I asrgacha bo‘lgan vaqtni qamrab oluvchi sopol buyumlarni to‘plagan.
O‘sha paytdagi topilmalar orasida obsidiandan yasalgan o‘q uchlari, suyak to‘g‘nog‘ichlar va bigizlar, munchoqlar, bronza uzuklar hamda ot anjomlarining qismlari bo‘lgan.