Armaniston sobiq prezidenti Robert Kocharyan va uning o‘g‘li qo‘lga olindi

Armanistonning avvalgi prezidenti Robert Kocharyan va uning o‘g‘li hibsga olindi.

“Armaniston” blokidan bo‘lgan muxolifatchi deputat Agnesa Xamoyanning Azer News’ga ma’lum qilishicha, Armanistonning sobiq prezidenti Robert Kocharyan Korrupsiyaga qarshi kurash qo‘mitasiga olib ketilgan.

Xamoyanning so‘zlariga ko‘ra, Kocharyan va uning kenja o‘g‘li Levon Kocharyanning uylarida tintuvlar o‘tkazilgan. Shuningdek, oilaga tegishli bir qancha ko‘chmas mulk obyektlarida ham tekshiruvlar bo‘lib o‘tgan.

Sobiq prezident devoni rahbari Bagrat Mikoyan Kocharyanning qo‘lga olinganini tasdiqladi. Armaniston OAV manbalarining xabar berishicha, soliq idoralari Kocharyan oilasiga tegishli Toyota avtosalonini muhrlab qo‘ygan. Bundan tashqari, Orange Fitness sport majmuasida ham tergov harakatlari olib borilmoqda.

Bu voqealar Levon Kocharyan va Armaniston bosh vaziri Nikol Pashinyan o‘rtasida parlamentda yuz bergan og‘zaki tortishuvdan bir kun o‘tib sodir bo‘ldi. Bahs-munozara chog‘ida Pashinyan deputatni barcha mol-mulkidan mahrum qilishini aytgan. Bosh vazir Kocharyan bu aktivlarni farzandlari va nevaralariga meros qilib qoldira olmasligini ta’kidlagan.