Armaniston sobiq prezidenti Robert Kocharyan sud zalidan kasalxonaga olib ketildi
Armanistonning avvalgi prezidenti Robert Kocharyan sud majlisidan to‘g‘ridan-to‘g‘ri shifoxonaga olib ketildi va u yerda yotqizildi. Bu haqda uning o‘g‘li Levon Kocharyan “RIA Novosti”ga ma’lum qildi.
Levon Kocharyan sud binosi oldida to‘plangan otasining tarafdorlariga shunday dedi: “Prezident shifokorlarning ko‘rsatmasiga binoan kasalxonaga olib ketildi. Sud majlisi uning advokatlari ishtirokida davom etadi. Qaror esa, katta ehtimol bilan, ertalab e’lon qilinadi”.
25-avgust kuni respublika Antikorrupsiya qo‘mitasi siyosatchi va uning o‘g‘li Sedrak Kocharyan Yerevanda hibsga olinganini e’lon qilgan edi.
Armaniston Bosh prokuraturasi sobiq prezidentga nisbatan bir nechta moddalar bo‘yicha ish ochilganini aniqlashtirdi. Bular mansab vakolatini suiiste’mol qilish, pora olish va jinoiy daromadlarni legallashtirish moddalaridir. Ayblanuvchilar orasida yana bir sobiq davlat rahbari Serj Sargsyan va 2007-yilda vafot etgan sobiq bosh vazir Andranik Markaryan ham bor. Shuningdek, Yerevanning sobiq meri Gagik Beglaryan va boshqa olti kishi ham ushbu ishga jalb qilingan.
Muxolifatdagi “Armaniston fraksiyasi” deputati Sevak Xachatryanning fikricha, Kocharyanning hibsga olinishiga 24-avgust kuni hukumat majlisida u va bosh vazir Nikol Pashinyan o‘rtasida yuz bergan og‘zaki tortishuv sabab bo‘lgan bo‘lishi mumkin.
Iyun oyida siyosatchining advokati Aram Orbelyan Markaziy saylov komissiyasi Armaniston bloki rahbari Kocharyanga nisbatan jinoiy ta’qib boshlashga ruxsat berganini aytgan edi. Advokatning tushuntirishicha, bu ish 2004–2009-yillardagi ko‘chmas mulk bitimlariga taalluqli.
Biroq uning mijozi bu bitimlarga umuman aloqador emas va barcha ayblovlar soxta. U mansab vakolatini suiiste’mol qilish moddasi bo‘yicha tergov harakatlari 2018-yildan beri davom etayotganini qo‘shimcha qildi. Ma’lumot o‘rnida, Robert Kocharyan 1998-yildan 2008-yilgacha Armaniston prezidenti lavozimida ishlagan.