Armaniston bosh vazirligiga muxolifatdan nomzod Pashinyanni sudga berdi

1 soat oldin

Uy qamogʻida boʻlgan va «Kuchli Armaniston» blokini boshqarayotgan armanistonlik tadbirkor Samvel Karapetyan Bosh vazir Nikol Pashinyanga qarshi daʼvo arizasi bilan chiqdi. U haqoratli soʻzlar uchun ommaviy uzr soʻrashni va taxminan 8,3 ming dollarni tashkil etuvchi 3 million dram miqdorida tovon puli toʻlanishini talab qilmoqda.

Daʼvo haqidagi maʼlumotlar Armanistonning Datalex sud axborot tizimida joylashtirilgan. Shu bilan birga, eʼlon qilingan maʼlumotlarda Karapetyan Pashinyanning aynan qaysi soʻzlarini haqoratli deb hisoblashiga aniqlik kiritilmagan. Faqatgina gap bosh vazirning 2026 yil 29 may kungi ommaviy chiqishi chogʻida aytgan gaplari haqida ketayotgani maʼlum.

Sudga murojaat qilishga Pashinyanning oʻsha kuni saylovoldi kampaniyasi doirasida qilgan bayonotlari sabab boʻlgan boʻlishi mumkin deb taxmin qilinmoqda. Oʻshanda bosh vazir Karapetyanning goʻyoki u tomonidan gallyutsinogen qoʻziqorinlar isteʼmol qilinishi haqidagi soʻzlariga izoh berib, tadbirkorning oʻzi shunday qoʻziqorinlarni isteʼmol qilishini aytgan edi.

Karapetyan, shuningdek, uzr soʻrash matni Pashinyanning rasmiy saytida va uning Facebook’dagi sahifasida eʼlon qilinishini talab qilmoqda. Bundan tashqari, tadbirkorning vakillari bosh vazirdan haqorat uchun kompensatsiya sifatida 3 million dram undirishni hamda sud xarajatlarini, jumladan, davlat boji va advokatlar gonorarlarini qoplashni soʻramoqda.

Karapetyanning oʻzi 2026 yilning yanvaridan buyon uy qamogʻida saqlanmoqda. Aprel oyida Armaniston Korruptsiyaga qarshi kurashish sudi ushbu ehtiyot chorasini yana uch oyga uzaytirdi.

Karapetyan 2025 yilning iyun oyida hokimiyatni egallab olishga ommaviy daʼvat qilish ayblovi bilan hibsga olingan edi. Keyinchalik unga nisbatan juda yirik miqdorda pul yuvish va soliq toʻlashdan boʻyin tovlash ishlari boʻyicha ham ayblovlar qoʻyildi. Tadbirkor qoʻyilgan ayblovlar boʻyicha oʻz aybini tan olmayapti.

Jinoiy taʼqib Karapetyanning Armaniston Apostol cherkovi va Pashinyan hukumati oʻrtasidagi nizo fonida cherkovni qoʻllab-quvvatlab qilgan ommaviy bayonotlaridan keyin boshlandi. Ushbu bayonotlardan soʻng bosh vazirning oʻzi tadbirkorning pozitsiyasini Armaniston uchun tahdid deb atagan edi.

Samvel Karapetyan «Tashir» kompaniyalar guruhiga egalik qiladi. 2026 yilning fevralida uning tarafdorlari tadbirkorni «Kuchli Armaniston» blokidan Armaniston bosh vaziri lavozimiga nomzod qilib koʻrsatdi. Oʻsha paytda u allaqachon uy qamogʻida edi.