AQSHning Eronga qarshi urush xarajatlari hisoblab chiqildi

AQSHning Eronga qarshi urushi xarajatlari hisoblab chiqildi

AQSHning Eron bilan urushi sentyabr oyi boshiga kelib kamida 45,1 milliard dollarga tushdi.

Bu mablag‘ning 28,1 milliard dollari sarflangan o‘q-dorilarga to‘g‘ri keladi. Bu barcha ko‘rsatilgan xarajatlarning qariyb 62 foizini tashkil etadi. Urush vaqtida shikastlangan Amerika bazalari va binolarini tiklash xarajatlari hisobga olinmagan.

3-sentyabr holatiga ko‘ra, xarajatlar 43,6 milliard dollarni tashkil etgan. Xususan, 28,1 milliard dollar o‘q-dorilarga, 11,2 milliard dollar harbiy operatsiyalarga va 4,3 milliard dollar yo‘qotilgan yoki shikastlangan texnikaga sarflangan. Ammo yonilg‘i uchun yana 1,5 milliard dollar kerak bo‘lgan. Pentagon Kongressga qonun chiqaruvchilar so‘ragan bilvosita xarajatlarning batafsil bahosini taqdim etmagan.

Iyul oyida Pentagon rahbari Pit Hegset urush xarajatlarini 37,5 milliard dollarga baholagan edi.

Kongress Byudjet boshqarmasining 15-sentyabrdagi mustaqil hisob-kitobiga ko‘ra, 1-avgust holatiga kelib, urush xarajatlari qariyb 38 milliard dollarni tashkil etgan. Idora bu summa shikastlangan obyektlarni tiklash va boshqa bir qator xarajatlarni o‘z ichiga olmasligini bildirgan.

Jangovar harakatlar nisbatan past sur’atda davom etsa, urush Pentagon uchun har oy yana qariyb 2 milliard dollarga, iyul oyidagiga o‘xshash eskalatsiya yuz bersa, 3 milliard dollar yoki undan ko‘proqqa tushadi.

Asosiy xarajat o‘q-dorilar bo‘lib qolmoqda. Pentagon bosh inspektori Eron bilan urush haqidagi birinchi choraklik hisobotida birinchi marta ularning yetishmovchiligini rasman tan oldi. O‘shanda 28-fevraldan 30-iyungacha bo‘lgan davr uchun xarajatlar 33,4 milliard dollarga baholangan, shundan 22,3 milliard dollari o‘q-dorilarga to‘g‘ri kelgan.

Kongressning Byudjet boshqarmasi eng ko‘p talab qilinadigan ba’zi o‘q-dorilar zaxirasini to‘ldirish 5 yil yoki undan ko‘proq vaqt olishi mumkinligi haqida ogohlantirgan. Urush energiya resurslari narxiga ham ta’sir ko‘rsatgan: mojaro bilan bog‘liq neft va gaz ta’minotidagi uzilishlar 2027-yilning birinchi choragida AQSH inflyatsiyasini taxminan 0,5 foiz bandga oshirishi kutilmoqda.