AQShni kaliyli oʻgʻitlar bilan qaysi davlatlar taʼminlamoqda?
AQShda isteʼmol qilinadigan kaliyli oʻgʻitlarning 73 foizi Kanada, 11 foizi Rossiya va 3 foizi Isroil hissasiga toʻgʻri keladi. Vashington Belarusdan arzonroq kaliyli oʻgʻitlar xarid qilish imkoniyatini koʻrib chiqayotgan boʻlsa-da, tashish xarajatlari va eksport yoʻllaridagi cheklovlar yakuniy narxga taʼsir qilishi mumkin.
AQShni kaliyli oʻgʻitlar bilan qaysi davlatlar taʼminlamoqda?
Visual Capitalist infografikasiga asoslangan materialda AQSH bozoriga kaliyli oʻgʻitlar yetkazib berayotgan asosiy davlatlar ko‘rsatilgan. Maʼlumotlar AQSH Geologiya xizmati — USGSʼning Mineral Commodity Summaries 2026-yillik sharhiga tayangan.
Hajmlar kaliy oksidi — K₂O hisobida berilgan. Bu turli kaliyli oʻgʻitlarni tarkibidagi kaliy miqdori bo‘yicha solishtirish imkonini beradi.
Kanadaning ustunligi nimada?
Kanada dunyodagi eng yirik kaliyli oʻgʻitlar ishlab chiqaruvchisi hisoblanadi. Ishlab chiqarishning katta qismi kaliyli tuzlarning ulkan zaxiralari joylashgan Saskachevan provinsiyasida to‘plangan.
Kanadaning AQSH qishloq xo‘jaligi hududlariga yaqinligi va rivojlangan temiryo‘l tarmog‘i yetkazib berishni osonlashtiradi. Saskachevanda joylashgan yirik ishlab chiqaruvchi Nutrien o‘zining Shimoliy Amerika transport tarmog‘i orqali AQSH bo‘ylab kaliyli oʻgʻitlar yetkazadi.
Mahsulotni quruqlik orqali tashish imkoniyati kanadalik yetkazib beruvchilarga dengiz yo‘llaridan foydalanadigan raqobatchilar ustidan logistika jihatidan ustunlik beradi.
Belarusdan xarid qilish rejasi
Materialda aytilishicha, 2026-yil sentabrida AQSH prezidenti Donald Tramp Vashington Belarusdan Kanada mahsulotiga qaraganda arzonroq narxda kaliyli oʻgʻitlar xarid qilish bo‘yicha yirik kelishuv ustida ishlayotganini bildirgan.
Biroq Belarus mahsulotini Amerika bozoriga yetkazishda bir qator to‘siqlar bor. Mamlakatning dengizga to‘g‘ridan to‘g‘ri chiqish imkoniyati yo‘q, Yevropa eksport yo‘nalishlaridan foydalanishda cheklovlarga duch keladi va Rossiya transport infratuzilmasiga sezilarli darajada bog‘liq.
Bundan tashqari, Belarus kaliyli oʻgʻitlarining Xitoy, Braziliya va Hindiston kabi yirik xaridorlari mavjud. Bu AQSH bozoriga qisqa muddatda yo‘naltirilishi mumkin bo‘lgan mahsulot hajmini cheklaydi.
Belarus oʻgʻitlari Kanada mahsulotiga nisbatan uzoqroq va murakkabroq yo‘lni bosib o‘tishi kerak. Shu sababli xarid narxining pastligi amerikalik isteʼmolchilar uchun yakuniy narx ham arzon bo‘lishini anglatmaydi.