AQShdan javob kutayotgan Eron va Rossiyaga kelayotgan «minglab» koreyalik askarlar – kun dayjesti
Oʻtgan kun davomida jahonda roʻy bergan eng asosiy voqea va yangiliklar sharhi bilan kundalik xabarnomada tanishtiramiz.
AQSh javobini kutayotgan Eron va Rossiyaga yo‘l olayotgan «minglab» koreyalik askarlar – kun dayjesti
AQSH va Eron vakillari dushanba kuni vositachilar bilan alohida-alohida muzokaralar olib bordi. Bu muzokaralar yetti oylik urushni to‘xtatishga qaratilgan yangi sa’y-harakatlar doirasida bo‘lib o‘tdi.
Reuters yozishicha, bu hafta bo‘lib o‘tadigan har qanday muzokara BMT tadbirlari doirasida Eron tomonidan taqdim etilgan yetti kunlik taklifning qayta ishlangan variantiga bag‘ishlanadi.
Eronning yetti kunlik rejasi barcha frontlarda jangovar harakatlarni to‘xtatish, Eronning milliardlab dollarlik aktivlarini muzlatishdan chiqarish, uning neftiga qo‘yilgan sanksiyalarni bekor qilish va AQSH blokadasini olib tashlashni ko‘zda tutadi.
Shundan keyin Eron Hormuz bo‘g‘ozining qayta ochilishiga ruxsat beradi. Tomonlar Eronning yadro dasturi va yuqori darajada boyitilgan uranni yo‘q qilish bo‘yicha muzokaralarni qayta boshlaydi. Tramp shanba kuni bu takliflarni rad etgan edi.
Eron OAVlariga ko‘ra, tashqi ishlar vaziri Abbos Araqchi so‘nggi takliflarga AQShning rasmiy javobini kutmoqda. «Agar amerikaliklar kelishuvga yoki tinch yechimga erishmoqchi ekanini daʼvo qilishsa, biz ana shu yechimni taqdim etdik», dedi Araqchi.
Prezident Donald Tramp ham qo‘shimcha tafsilotlarni oshkor qilmagan holda, dushanba kuni AQSH rasmiylari vositachilar bilan alohida muloqot o‘tkazganini aytdi.
Urush fevral oyi oxirida AQSH va Isroilning Eronga hujumlari bilan boshlangan bo‘lib, yetti oy davomida minglab odamlar hayotiga zomin bo‘ldi. Neft tashish uchun hayotiy muhim bo‘lgan dengiz yo‘llari to‘sib qo‘yilgani sababli jahon bozorlarini larzaga soldi. AQSH va Eron avvalroq vositachilik orqali o‘tkazilgan tinchlik muzokaralarida ikki marta — aprel va iyun oylarida — o‘t ochishni to‘xtatishga kelishgandi. Biroq bu kelishuvlar tezda barbod bo‘lgan.
Shimoliy Koreya Rossiyaga 10 mingga yaqin harbiy xizmatchini jo‘natishga tayyorgarlik ko‘rmoqda. Shu bilan birga, sakkiz mingdan ortiq shimollik askar allaqachon mamlakat hududida bo‘lib turibdi. Bu haqda razvedka ma’lumotlariga tayanib, dushanba kungi murojaatida Ukraina prezidenti Volodimir Zelenskiy ma’lum qildi.
Ukraina rahbarining aytishicha, hozirda harbiylar «tayyorgarlikdan o‘tish va keyinchalik jo‘natilish uchun tanlab olinmoqda». «Rossiya hukumati xorijliklarni yollashni ko‘paytirishni rejalashtirmoqda. Rossiya o‘z armiyasiga odamlarni jalb qilayotgan mamlakatlar hukumatlari bunga qarshilik ko‘rsatishi muhim. Biz har bir hukumatni xabardor qilamiz», dedi Zelenskiy.