AQSHdagi eng keksa mahbus vafot etdi: u 75 yilini qamoqda o‘tkazdi
AQSHning eng keksa mahbusi, Frensis Klifford Smit, 75 yildan ortiq vaqtini qamoqda o‘tkazib, tabiiy o‘lim topdi. U sakkiz marta qatl etilishga buyurilgan va har safar "so‘nggi kechki taom"ni tanovul qilgan bo‘lsa-da, ijro har doim keyinga qoldirilgan.
Smit Konnektikut qamoqxonasida 75 yildan ziyod umr kechirdi. U ilk bor 1950-yilda o‘lim jazosiga hukm qilingan edi. Biroq, umrining oxirigacha o‘zi sodir etmagan qotillik uchun qamalganini ta’kidlab keldi. Uning ishi bo‘yicha o‘nlab yillar davomida ko‘plab shubhalar mavjud edi.
1949-yil 23-iyul kuni erta tongda Grinvichdagi yaxta klubda o‘g‘rilik sodir bo‘lgan va tungi qorovul Grover Hart otib o‘ldirilgan. 25 yoshli Smit ushbu qotillikda aybdor deb topilgan. Hart 22 kalibrli revolver o‘qidan halok bo‘lgan, ammo jinoyat joyidan topilgan boshqa bir o‘q va to‘rtta gilza boshqa qurolga tegishli bo‘lgan. Bu holat sudni jinoyatchilar ikki kishi bo‘lgan degan xulosaga olib kelgan.
Jorj Louden ismli gumondor o‘z aybini tan olgan. Smitga qarshi esa asosan ehtimoliy dalillar guvohlik bergan. Nyu-York shtatidagi kafe qarshisida to‘xtatilgan kulrang Cadillac mashinasidan jinoyat qurollaridan biri, shuningdek, yaxta klubdan o‘g‘irlangan taqinchoqlar va boshqa buyumlar topilgan. Smit ushbu kafeda biroz avval ko‘ringan edi. Bundan tashqari, mashinadan unga tegishli deb taxmin qilingan ko‘ylak ham topilgan. Bu dalillar unga hukm chiqarish uchun yetarli bo‘lgan.
Smitni qatl qilish sanasi sakkiz marta belgilangan va sakkiz marta bekor qilingan. 1954-yilda o‘lim jazosi umrbod qamoq jazosiga almashtirilgan. 1967-yilda u qamoqdan qochishga muvaffaq bo‘lgan va 12 kun erkinlikda yurgan. 1975-yilda Smit shartli ravishda ozodlikka chiqarilgan. Biroq, taxminan 10 oy o‘tib, o‘g‘rilik va noqonuniy qurol saqlashda ayblanib, yana qamoqqa qaytarilgan.
Osborn qamoqxonasida Smitga "osbornlik qushboqar" degan laqab berilgan. U kiyimiga non yashirib, qushlarni boqib yurgan. Qamoqxona qo‘riqchilari buni bilgan va bunga ko‘z yumgan. Smit 2020-yildagina qamoqxonadan chiqarilgan. Lekin u qariyalar uyida nazorat ostida yashashda davom etgan. U 2026-yil iyun oyining oxirida, 101 yoshida, uxlab yotganida o‘z ajali bilan vafot etdi.