AQShda qulogʻi ogʻir insonlarga moʻljallangan koʻzoynaklar sotuvga chiqdi
Koʻzoynakka oʻrnatilgan mikrofonlar atrofdagi tovushlarni qabul qiladi, protsessor kelayotgan ovoz signallarini tahlil qiladi, inson nutqini ajratadi. Qayta ishlangan tovush quloqlar yaqinida joylashgan kichik dinamiklar orqali uzatiladi. Bunda quloq ichiga biror qurilma joylashtirish talab etilmaydi
AQShda qulogʻi ogʻir insonlar uchun moʻljallangan koʻzoynaklar savdoga chiqarildi
Amerikaning Legato kompaniyasi bir vaqtning oʻzida koʻrishni toʻgʻrilash va eshitish qurilmasi vazifasini bajarishga moʻljallangan Frames koʻzoynaklarini sotuvga chiqardi. Koʻzoynak gardishlariga mikrofonlar, protsessor va dinamiklar joylashtirilgan. Tovushni qayta ishlash tizimi esa atrofdagi shovqinlar orasidan inson nutqini ajratib beradi.
Bu koʻzoynaklar eshitish qobiliyati yengil va oʻrtacha darajada pasaygan insonlar uchun ishlab chiqilgan. Mikrofonlar atrofdagi tovushlarni uzluksiz qabul qilib turadi. Ularga oʻrnatilgan protsessor kelayotgan ovoz signallarini tahlil qiladi, inson nutqini ajratadi va turli chastotalarning kuchayish darajasini boshqaradi.
Qayta ishlangan tovush quloqlar yaqinida joylashgan kichik dinamiklar orqali uzatiladi. Bunda quloq ichiga hech qanday qurilma joylashtirish talab etilmaydi. Quloqlar ochiq qoladi, shu sababli inson atrofdagi tovushlarni tabiiy ravishda eshitishda davom etadi.
Ishlab chiqaruvchi ovozni yoʻnaltirilgan holda uzatish texnologiyasini ham qoʻllagan. Bu yaqin atrofdagi odamlar koʻzoynakdan chiqayotgan ovozni eshitishini kamaytirishga yordam beradi. Ovozni qayta ishlash jarayoni bevosita koʻzoynakning oʻzida amalga oshiriladi. Qurilmada kamera yoʻq va suhbatlar yozib olinmaydi.
Foydalanuvchi smartfon uchun ishlab chiqilgan maxsus ilova orqali tovush balandligini boshqarishi, turli sharoitlarga moslab ovozni qayta ishlash parametrlarini tanlashi mumkin.
Koʻzoynak gardishiga oddiy yoki retsept asosida tayyorlangan linzalarni oʻrnatish mumkin. Gardish turiga qarab, linzalarsiz koʻzoynakning ogʻirligi 27 grammdan, linzalar oʻrnatilgandan keyin esa taxminan 34 grammdan boshlanadi.
Koʻzoynakka oʻrnatilgan akkumulyator 10 soatdan ortiq ishlaydi. Toʻliq quvvatlanish uchun ikki soatga yaqin vaqt kerak boʻladi. Yarim soatlik quvvatlash esa qoʻshimcha ikki soat foydalanish imkonini beradi.
Qurilma Bluetooth 5.3 texnologiyasini ham qoʻllab-quvvatlaydi. Uni smartfonga ulab, telefon orqali suhbatlashish va musiqa tinglash mumkin.
Legato uch xil gardishli — Aria, Harmony va Symphony koʻzoynaklarini sotuvga chiqardi. Harmony va Symphony narxi 999 dollardan, Aria narxi esa 1099 dollardan boshlanadi.