AQShda oʻlim jazosi jonli efirda koʻrsatiladi: 13 kishini oʻldirgan sobiq mayor qatl etiladi

AQShda oʻlim jazosi jonli efirda namoyish etiladi: 13 kishini oʻldirgan sobiq mayor qatl qilinadi

Reuters agentligi 8-oktabr kuni Pentagon vakiliga tayanib, qatl jonli efirda uzatilishini maʼlum qildi. Translyatsiya tafsilotlari keyinroq eʼlon qilinishi aytilgan.

Agar reja amalga oshsa, Hasan 1945-yildan beri AQSH harbiylari tomonidan otib qatl etilgan ilk mahkum boʻladi. AQSH harbiy tizimidagi soʻnggi oʻlim jazosi esa 1961-yilda ijro etilgan.

Hasanga oʻlim jazosini otib qatl etish usulida ijro etish taklifini AQSH mudofaa vaziri Pit Hegset ilgari surgan. Prezident Donald Tramp bu qarorni maʼqullagan.

Hegset intervyularidan birida hukmni askarlar ijro etishi va odamlar bu jarayonni kuzatishi uchun imkoniyat yaratilishini aytgan. U buni bunday jinoyatlarning ogʻir oqibatlari borligini koʻrsatish zarurati bilan izohlagan.

Armiyada psixiatr sifatida xizmat qilgan Nidal Hasan 2009-yil 5-noyabrda Fort-Xud bazasida tibbiy koʻrikdan oʻtish uchun yigʻilgan qurolsiz odamlarga qarata oʻq uzgan.

Hujum oqibatida 13 kishi halok boʻlgan, yana 32 kishi yaralangan. Hasanning oʻzi ham javob oʻqi natijasida jarohat olgan va shundan beri oyoqlari falaj boʻlib qolgan.

U oʻz harakatlarini Afgʻonistondagi musulmonlarni Amerika askarlaridan himoya qilish istagi bilan izohlagan.

2013-yilda harbiy sud Hasanni aybdor deb topib, oʻlim jazosiga hukm qilgan. Sud hayʼati toʻrt soatlik muhokamadan soʻng qarorni bir ovozdan qabul qilgan.

Hasan sud jarayonida hujumni amalga oshirganini inkor etmagan. U advokatlar xizmatidan voz kechib, oʻzini oʻzi himoya qilgan, biroq foydasiga guvohlar yoki dalillar taqdim etmagan.

Unga qonun talabi bilan tayinlangan advokatlar Hasan ataylab oʻlim hukmi chiqarilishiga erishishga uringan boʻlishi mumkinligini bildirgan.

Shundan beri u Kanzas shtatidagi harbiy qamoqxonada saqlanmoqda.