AQShda gipertovushli raketalarni ham urishga moʻljallangan yangi raketalar taqdim etildi
AQShning Anduril kompaniyasi havo va raketa hujumidan mudofaa vazifalari uchun Steelfin tutuvchi raketalar oilasini taqdim etdi. Kompaniya ularni turli tahdidlarga qarshi moslashtirish va nisbatan kam xarajat bilan katta hajmda ishlab chiqarishni maqsad qilgan. Raketalarning narxi va batafsil texnik koʻrsatkichlari hozircha ochiqlanmagan.
AQShda gipertovushli raketalarni ham urib tushirishga moʻljallangan yangi raketalar namoyish etildi. Bu yondashuv har bir vazifa uchun mutlaqo yangi raketa yaratish o‘rniga, mavjud konstruksiyani moslashtirish imkonini berishi kutilmoqda.
Taqdimot AQSH qurolli kuchlari arzon dronlardan tortib qanotli, ballistik va gipertovushli raketalargacha bo‘lgan havo tahdidlariga qarshi mudofaa vositalari zaxirasini oshirishga intilayotgan bir paytda bo‘lib o‘tdi.
Steelfin oilasi yagona ikki bosqichli sxemaga tayangan. Birinchi bosqich raketani tezlashtiruvchi blokdan, ikkinchisi esa nishonni bevosita yo‘q qilishga mo‘ljallangan tutuvchi qismdan iborat.
Turli variantlarda korpusning asosiy konstruksiyalari, bort elektronikasi, dasturiy ta’minot, parvozni boshqarish tizimi va ulanish interfeyslaridan umumiy foydalanish rejalashtirilgan. Tezlashtiruvchi bloklar va ikkinchi bosqich qismlarini almashtirish orqali raketa muayyan vazifaga moslashtiriladi.
Anduril ma’lumotiga ko‘ra, oila tarkibida nishonni bevosita urilish orqali yo‘q qiladigan tutuvchilar ham, parchalanuvchi-fugas jangovar qismga ega variantlar ham bo‘ladi.
Kompaniya Steelfin orqali alohida obyektlarni himoya qilishdan tortib, pastki eshelondagi havo va raketa mudofaasi hamda yuqori eshelonda ballistik raketalarni tutib qolishgacha bo‘lgan vazifalarni qamrab olishni maqsad qilmoqda. Mo‘ljallangan nishonlar orasida qanotli va gipertovushli raketalar ham bor.
Biroq qaysi modifikatsiya aynan qaysi tahdidga qarshi qo‘llanishi hozircha aniqlashtirilmagan. Tutib qolish masofasi, qo‘llash balandligi va e’lon qilingan imkoniyatlarni baholashga yordam beradigan boshqa ko‘rsatkichlar ham keltirilmagan.
Anduril Steelfin ustida bir necha yildan beri, bir nechta buyurtmachining moliyaviy ishtiroki bilan ishlayotganini bildirgan. Kompaniya dasturga xos maketlar va taqlidiy apparatlar yordamida ballistik sinovlar o‘tkazgan.
Steelfin’ning turli variantlari bo‘yicha parvoz sinovlari 2027-yilga rejalashtirilgan.