AQSH Yaponiyani ortda qoldirdi: eng koʻp poʻlat ishlab chiqaruvchi 10 davlat
2025-yil yakunlariga koʻra, AQSH poʻlat ishlab chiqarish hajmi boʻyicha Yaponiyani ortda qoldirib, dunyoda uchinchi oʻringa koʻtarildi. Xitoy jahon ishlab chiqarishining qariyb 52 foizi bilan yetakchilikni saqlab qoldi, ikkinchi oʻrindagi Hindiston esa birinchi oʻnlikda eng katta hajmdagi oʻsishni qayd etdi.
AQSH Yaponiyani ortda qoldirdi: poʻlat ishlab chiqaruvchi eng yirik 10 davlat
Jahon poʻlat ishlab chiqaruvchilar assotsiatsiyasi — Worldsteel’ning **World Steel in Figures 2026** maʼlumotnomasida mamlakatlarning 2025-yildagi toʻliq natijalari berilgan. Ushbu reyting 2026-yil uchun prognozni emas, balki oʻtgan yilda amalda ishlab chiqarilgan poʻlat hajmini koʻrsatadi.
Xitoyda 2025-yilda 960,8 million tonna poʻlat ishlab chiqarilgan. Bir yil avval bu koʻrsatkich 1 milliard 5,1 million tonna edi. Ishlab chiqarish kamayganiga qaramay, mamlakatning boshqa davlatlar ustidan ustunligi hanuz juda katta.
Hindiston esa poʻlat ishlab chiqarishni 149,4 million tonnadan 164,9 million tonnaga oshirgan. Bu 15,5 million tonna qoʻshimcha mahsulot degani.
AQSH 81,9 million tonna bilan uchinchi oʻrinni egallagan. Yaponiya 80,7 million tonna poʻlat ishlab chiqarib, toʻrtinchi pogʻonaga tushgan. Rossiya beshinchi, Janubiy Koreya esa oltinchi oʻrinni saqlab qolgan. Turkiya Germaniyadan yuqorilagan.
2025-yilda eng koʻp poʻlat ishlab chiqargan 10 davlat:
Xitoy - 960,8 million tonna;
Hindiston - 164,9 million tonna;
AQSH - 81,9 million tonna;
Yaponiya - 80,7 million tonna;
Rossiya - 67,9 million tonna;
Janubiy Koreya - 62,2 million tonna;
Turkiya - 38,1 million tonna;
Germaniya - 34,1 million tonna;
Braziliya - 33,4 million tonna;
Eron - 32 million tonna.
Jahon bo‘yicha umumiy ishlab chiqarish 2024-yildagi 1 milliard 886,8 million tonnadan 2025-yilda 1 milliard 848,9 million tonnaga tushgan. Bu qariyb 2 foizlik pasayishdir. Biroq holat mamlakatlar kesimida turlicha bo‘lgan: Hindiston va AQSHda oʻsish kuzatilgan, Xitoy va Yaponiyada esa ishlab chiqarish kamaygan.