AQSH Ukraina bilan razvedka ma’lumotlari almashishni qayta tikladi

AQSH va Ukraina o‘rtasidagi razvedka ma’lumotlari almashinuvi yana to‘liq hajmda yo‘lga qo‘yildi. Bu haqda Politico nashri xabar berdi.

Maqolada ta’kidlanishicha, ikki davlat o‘rtasidagi razvedka sohasidagi hamkorlik avvalgi yuqori darajasiga qaytgan. AQSH Senatining razvedka qo‘mitasi a’zosi Mark Uornerning so‘zlariga ko‘ra, bu yaxshilangan hamkorlik Kiyevga Rossiya bilan to‘rt yillik urushda ustunlikka erishishga yordam bermoqda. Ukraina Qurolli kuchlari taqdim etilgan ma’lumotlardan Rossiya hududidagi operatsiyalarni amalga oshirishda foydalanmoqda.

AQSH 2025-yil mart oyida Ukraina bilan razvedka ma’lumotlarini bo‘lishishni vaqtincha to‘xtatgan edi, biroq keyinchalik bu hamkorlik bosqichma-bosqish tiklana boshladi. Qo‘shma Shtatlar davlat kotibi Marko Rubio 2026-yil iyun oyi boshida Vashingtonning xolis vositachi emasligini va ochiqchasiga Kiyev tarafida turganini ta’kidlagan edi.

Rubio, shuningdek, har qaysi tomonning yon berishida hech qanday ijobiy narsa ko‘rmayotganini va diplomatik muzokaralar natija bermaganini qo‘shimcha qilgan. Shunga qaramay, u AQSH vositachilik sa’y-harakatlarini davom ettirishga tayyorligini bildirgan.

Rossiya tashqi ishlar vaziri Sergey Lavrov Rubioning bu so‘zlarini rad etib, prezident Vladimir Putin 2025-yilda Alyaskadagi sammit paytida Donald Trampning takliflarini qabul qilganini eslatib o‘tgan. Rubioning fikrlariga munosabat bildirar ekan, Lavrov “Bayden urushi” endi “Tramp urushi”ga aylanganini ta’kidlagan.

Avvalroq AQSH va Fransiya Ukrainaga Rossiya havo mudofaasi tizimlari qayerda joylashganini aniqlashda yordam beruvchi razvedka ma’lumotlarini taqdim etgani haqida xabar berilgandi. Ukrainalik mulozimlarga ko‘ra, bu ma’lumotlar dronlarga havo mudofaasini aylanib o‘tib, neftni qayta ishlash zavodlariga zarba berishga imkon yaratgan.