AQSh saylov idoralariga «shubhali moddalar» solingan maktublar yuborildi
Bir qator shtatlar, jumladan Oklaxoma, Ohayo va Luiziana pochta joʻnatmalari nishoniga aylanganini tasdiqladi.
AQSh saylov idoralariga «gumonli moddalar» solingan xatlar yuborildi
Federal rasmiylar AQSh boʻylab kongress va shtat saylov idoralariga yuborilgan «gumonli moddalar» boʻlgan «xavfli boʻlishi mumkin boʻlgan» xatlarni tergov qilayotganini aytmoqda.
FQB va AQSh Pochta inspektsiyasi xizmati (USPIS) baʼzilari yetkazib berilguniga qadar toʻxtatib qolingan «gumonli pochta joʻnatmalari»ning iziga tushish boʻyicha ishlayotganini maʼlum qildi.
Rasmiylar qancha idora nishonga olinganini ochiqlamadi, ammo bir nechta shtat kotiblari va kongress idoralari ushbu xatlarni olganini bildirdi.
AQShda oraliq saylovlarga atigi bir necha hafta qolganida sodir boʻlgan ushbu hodisalar gumonli pochta bilan bogʻliq avvalgi xavfsizlik tashvishlarini yodga soladi.
«FQB va AQSh Pochta inspektsiyasi xizmati jamoatchilik xavfsizligini taʼminlash va Amerika fuqarolari uchun saylovlar xavfsizligini himoya qilishda davom etadi», deyiladi idoralarning payshanba kungi bayonotida.
Oklaxoma shtati saylov komissiyasi va Luiziana shtati kotibi ushbu haftada oʻz idoralariga oq kukun solingan xatlar kelganini maʼlum qilishdi.
Luizianadagi idora seshanba kuni xodim oʻramni ochganidan keyin evakuatsiya qilingan edi, ammo huquq-tartibot idoralari zararli moddalar dalilini topmagach, u qayta ochildi.
Ohayo shtati kotibi Frenk LaRouzning aytishicha, uning idorasiga oq kukunli xat yuborilgan, ammo USPIS uni tutib qolgan.
Konnektikut shtatidan demokrat senator Kris Myorfiga ham gumonli modda boʻlgan xat yuborilgan, ammo u idoraga yetib borishidan oldin tutib qolingan, dedi uning matbuot kotibi.
BBC koʻrib chiqqan favqulodda xizmatlar radiokanali xabarlariga koʻra, Olbanidagi Nyu-York shtati Kapitoliysi va Shayndagi Vayoming shtati Kapitoliysiga ham gumonli oʻramlar kelgan.
Gumonli pochta joʻnatmalari Kongressdagi kuchlar muvozanatini belgilab beradigan saylov kuniga bir necha hafta qolganda yuborilmoqda.
2024 yilgi saylovlar oldidan 17 ta shtatdagi saylov mutasaddilari gumonli oʻramlarni qabul qilib olishgan edi
Bir yil oldin esa kamida beshta shtatdagi saylov idoralariga gumonli konvertlar, baʼzilari fentanil aralashtirilgan holda yuborilgan edi.