AQSH Putinni Mayamida oʻtkaziladigan G20 sammitiga taklif qildi
AQSH Putinni Mayamida boʻladigan G20 sammitiga taklif qildi
Rossiya prezidenti Vladimir Putin 14–15-dekabr kunlari Mayamida oʻtkaziladigan G20 sammitiga taklif etilgan. Bu haqda AQSH davlat kotibi Marko Rubio jurnalistlar savollariga javob berar ekan maʼlum qildi.
“Fikrimizcha, bu unga nafaqat AQSH prezidenti, balki boshqa jahon yetakchilari bilan ham muloqot qilish imkonini beradi. Taklif qabul qilinadi, degan umiddamiz”, dedi Rubio.
Uning aytishicha, agar odamlar faqat oʻzlari bilan bir xil fikrlaydiganlar bilan uchrashsa, bunday uchrashuvlar shubhasiz juda yoqimli kechadi, ammo muammolarni hal qilish nuqtai nazaridan hech narsani oʻzgartirmaydi.
“Muammolarni hal qilish uchun siz bilan bir xil fikrlamaydiganlar bilan ham koʻrishish kerak”, dedi AQSH davlat kotibi.
Moskva energetika sektoriga oʻt ochishni toʻxtatishdan manfaatdor-mi, degan savolga Rubio shunday javob berdi:
“Menimcha, har ikki tomon don va energetika sohalarini qamrab oladigan maʼlum darajada cheklangan sulhga qiziqish bildirgan. Bu urush muammosini hal qilmaydi, biroq hozirgi global keskinlikni maʼlum darajada yumshatishga yordam berishi mumkin, deb oʻylayman”.
Bundan ikki kun oldin Bloomberg Putin Xitoyda boʻlib oʻtadigan Osiyo-Tinch okeani iqtisodiy hamkorligi (APEC) sammitida qatnashishni rejalashtirayotgani, ammo G20 sammitiga bormasligi mumkinligini yozgandi. Agentlik manbalari Putinning Mayamidagi sammitda Tramp bilan uchrashish ehtimolini “nihoyatda past” deb baholagan.
Putin Donald Tramp bilan soʻnggi marta 2025-yil 15-avgustda Alyaskada uchrashgan. Bu Rossiyaning Ukrainaga keng koʻlamli bosqini boshlanganidan beri ularning yagona yuzma-yuz uchrashuvi boʻldi. Uchrashuvdan keyin ahamiyatga molik natijalar eʼlon qilinmadi.
Oʻz navbatida Ukraina prezidenti Vladimir Zelenskiy urushni tugatish masalasini muhokama qilish uchun Putin bilan shaxsan uchrashishga tayyorligini bir necha bor bildirgan. Kreml esa bunday uchrashuv faqat Moskvada oʻtkazilishi mumkinligini aytib keladi.