AQSh prokurorlari Kornell universitetidagi guruhli zoʻrlash gumoni boʻyicha ishni qayta ochdilar
Bu ayol 2024 yilda talabalar birodarligi uyida unga giyohvand modda berilgani va zoʻrlangani haqida daʼvo arizasi bilan fuqarolik sudiga murojaat qilganidan keyin yuz berdi.
AQSh prokurorlari Kornell universitetidagi guruhiy zoʻrlash gumoni bilan bogʻliq ishni qayta ochmoqda
Nyu-York shtati prokurorlari 2024 yilda Kornell universitetida bir ayolning zoʻrlangani toʻgʻrisidagi gumonlar boʻyicha jinoiy tergovni qayta ochishlarini maʼlum qilishdi.
Ayol 16 sentyabr kuni fuqarolik daʼvosi arizasini topshirib, unda universitetdagi talabalar jamiyati (fraternity) binosida bir necha kishi tomonidan unga giyohvand modda berilgani va zoʻrlanganini daʼvo qilgan.
«Tegishli ayblovlarni aniqlaganimizdan soʻng, ish katta hakamlar hayʼati (grand jury) orqali imkon qadar xolis va betaraf tarzda jinoiy taʼqib qilinadi», dedi Tompkins okrugi prokurori Mettyu Van Xauten dushanba kuni.
Kornell universiteti ishni katta hakamlar hayʼatiga taqdim etilishini qoʻllab-quvvatlashini bildirgan boʻlsa-da, «universitet voqeaga aloqador shaxslarga nisbatan jiddiy jazo choralarini qoʻllamagan degan har qanday iddao haqiqatga toʻgʻri kelmaydi» deb bayonot berdi.
Sud hujjatlarida Jeyn Dou deb koʻrsatilgan ayol oʻz daʼvo arizasida 2024 yil 19 oktyabr kechasi Kornellning «Chi Phi» talabalar jamiyati filialidan boʻlgan yetti nafar erkak spirtli ichimliklar va ketamin preparati bilan bogʻliq holatda unga nisbatan zoʻravonlik qilganini daʼvo qilmoqda.
Jeyn Dou oʻz daʼvosida ushbu voqea sodir boʻlgan paytda mast holatda boʻlgani va rozilik berishga qodir emasligini aytgan.
U voqea haqida 2024 yil 8 noyabrda Kornell universiteti politsiyasiga xabar berganini bildirgan.
Daʼvo arizasida, shuningdek, Snapchat ilovasidagi talabalar jamiyati guruhiy chatidan olingani aytilayotgan surat ham bor boʻlib, unda ishtirokchilardan biri boshqa aʼzolarni Jeyn Dou bilan jinsiy aloqada boʻlish imkoniyati haqida qoʻpol soʻzlar bilan ogohlantirgan.
Van Xauten dushanba kuni ikki yil oldingi zoʻravonlik sodir boʻlgan paytda uning idorasi ayolning huquq-tartibot idoralariga bergan koʻrsatmasidagi dalillar ayblov qoʻyish uchun qonuniy asosga ega emas degan xulosaga kelganini aytdi.
U ishni katta hakamlar hayʼatiga olib chiqishga tayyorgarlik koʻrar ekan, qoʻshimcha maʼlumot olish uchun Jeyn Dou va uning advokatlari bilan bogʻlanganini bildirdi.
AQSh huquq tizimida prokurorlar dalillar va koʻrsatmalarni baholash hamda yakunda ular jinoiy ayblov qoʻyish uchun yetarlimi-yoʻqmi degan masalada ovoz berish uchun katta hakamlar hayʼatini chaqiradilar.
Van Xauten oʻz bayonotida Jeyn Dou 2024 yilda sodir boʻlgan hujumdan keyin Kornell universiteti politsiya departamentiga aytgan gaplarining qisqacha mazmunini ilova qildi. U ushbu koʻrsatma daʼvo arizasida keltirilgan iddaolardan farq qilishini taʼkidladi.
«Jeyn Douning 2024 yil noyabridagi qasamyod ostida bergan koʻrsatmasida uning oʻz xohishiga qarshi ravishda giyohvand modda berilgani yoki guruhiy zoʻrlangani haqida iddao qilinmagan edi», dedi Van Xauten dushanba kungi bayonotida.
«Aksincha, Jeyn Douning koʻrsatmasida uning giyohvand moddalar isteʼmol qilishi va jinsiy aloqada boʻlishi ixtiyoriy, ongli va oʻzaro rozilik asosida boʻlgani tasvirlangan».
Van Xautenning qoʻshimcha qilishicha, Jeyn Douning advokatlari uning dastlabki koʻrsatmasi notoʻgʻri boʻlganini aytish yoki ayblov qoʻymaslik haqidagi qarorini qayta koʻrib chiqishni soʻrash uchun u bilan hech qachon bogʻlanishmagan.
Keyinchalik u «jinsiy zoʻravonlik qurbonlari sodir boʻlgan voqeani toʻliq anglab yetishlari va tushunishlari uchun yillar davomida terapiya va sogʻayish jarayoni talab etilishi mumkinligi haqidagi haqiqatni» tan oldi.
Bi-bi-sining AQShdagi hamkori boʻlmish CBS telekanali tomonidan qoʻlga kiritilgan dushanba kungi bayonotda u shunday dedi: «Hujumdan keyingi kunlarda [Jeyn Dou] ruhiy shikastlangan, karaxt ahvolda edi va sodir boʻlgan dahshatni qabul qila olmas yoki normal harakat qila olmas edi. U oʻzini himoya qilish rejimida edi».
Juffraning aytishicha, Jeyn Dou uning dastlabki shikoyatini qabul qilgan xodimdan boshqa hech kim bilan gaplashmagan va qoʻshimcha qilgan: «Men hech boʻlmaganda undan bir necha bor intervyu olinishini, huquq-tartibot idoralari tomonidan dalillar yigʻilishini va ish ishlab chiqilishini kutgan edim. Bu ogʻir jinoyatlarni tergov qilishning odatiy ketma-ketligidir».
«Prokuror bayonotlaridan sezgan himoyaviy pozitsiyam meni ular kamchiliklar boʻlganini tan olishayotgani va ularni oqlashga harakat qilishayotganiga ishonishga undamoqda», dedi u.
Jeyn Dou oʻz fuqarolik daʼvosida, shuningdek, Kornell uni himoya qilmaganini va unga aloqador erkaklarni yetarlicha jazolamaganini daʼvo qilib, ularga «insholar topshirish orqali oʻz xatti-harakatlarini yumshatish imkoniyati berilganini» iddao qildi.
Daʼvo arizasida aytilishicha, Jeyn Dou ushbu voqea va universitetning bunga boʻlgan munosabati tufayli «ogʻir hissiy va ruhiy iztirob hamda jismoniy jarohat olgan», voqea haqidagi xabar esa tez fursatda maktab boʻylab tarqalgan.
2024 yil noyabr oyida Kornell universiteti «Chi Phi talabalar jamiyati binosida giyohvand moddalarni suiisteʼmol qilish va jinsiy zoʻravonlik haqidagi jiddiy va chuqur tashvish uygʻotuvchi iddaolar» boʻyicha ommaviy bayonot berib, kampus politsiya departamenti tergov olib borayotganini va Chi Phi talabalar jamiyatining mahalliy boʻlimi hamda «bir qator talabalar» faoliyatini toʻxtatib qoʻyganini maʼlum qilgan edi.
Kornell, shuningdek, ichki tergov hamda federal hukumatdan moliyaviy mablagʻ oladigan maktablarda, jumladan, aksariyat universitetlarda jinsiy kamsitishni taqiqlovchi Title IX qonuniga muvofiq fuqarolik huquqlari boʻyicha surishtiruv boshlaganini aytgan edi.
Dushanba kuni universitet Jeyn Douning voqeani yetarlicha tergov qilmagani yoki gumonlanuvchilarni jazolamagani haqidagi iddaosini rad etdi.
Universitet oʻz bayonotida ushbu masala «maxsus tayyorgarlikdan oʻtgan professor-oʻqituvchilar va xodimlar hayʼatiga» yuborilganini va ular «Kornelldan haydash va oʻqishdan chetlatishni oʻz ichiga olgan bir qator jazo choralarini» qoʻllaganini maʼlum qildi.
«Ayblangan shaxslarning hech biriga qilgan ishlarining yagona oqibati sifatida insho yozish imkoniyati taklif qilinmagan», dedi Kornell.
Daʼvo arizasida nomi keltirilgan erkaklardan birining advokati Jeremi Saland bu iddaolarni rad etdi.
Saland oʻz mijozi «Snapchat'da nooʻrin izohga javob bergani va shunday izoh qoldirganini» tan oldi, lekin «boshqa hech narsa qilmagan». Saland oʻz mijozining «hech qanday jinsiy aloqada boʻlmaganini, daʼvogarga hech qanday tarzda tegmaganini va ketamin isteʼmol qilmaganini» daʼvo qildi.
Ushbu ish Douning daʼvo arizasi va ishning qayta ochilishi haqidagi eʼlondan keyin butun mamlakat eʼtiborini tortdi. Bir nechta mashhur shaxslar, jumladan, aktrisa Florens Pyu ham bu borada oʻz fikrini bildirdi.