AQSH Misrning ikkinchi eng yirik bankini jahon moliya tizimidan uzib qo‘ymoqchi
AQSH Misrning ikkinchi yirik bankini global moliya tizimidan uzib qo‘yishni rejalashtirmoqda.
AQSH Moliya vazirligi 28-avgust kuni Misrning Banque Misr bankining Birlashgan Arab Amirliklaridagi (BAA) filiallarini jahon moliya tizimidan chetlatish niyatini e’lon qildi. Prezident Donald Tramp ma’muriyati bu harakat bilan Eronning "yordamchilari" deb atalgan tuzilmalarni moliyaviy jihatdan zaiflashtirishni maqsad qilgan.
Misrning ikkinchi eng yirik banki bo‘lgan Banque Misrning BAA bo‘limi 28-sentyabrdan boshlab AQSH dollarida operatsiyalar o‘tkaza olmaydi.
30 kunlik ogohlantirish muddati davomida jamoatchilik o‘z fikrlarini bildirish imkoniyatiga ega bo‘ladi. Bu jarayonda AQSH hukumati qarorga ta’sir qilishi mumkin bo‘lgan qo‘llab-quvvatlash yoki qarshilik xabarlarini to‘playdi.
Moliya vazirligining bayonotida aytilishicha, "Vazirlikning Moliyaviy jinoyatlarga qarshi kurash tarmog‘i (FinCEN) Banque Misr UAE’ni AQSH bank tizimidan uzib qo‘yishni taklif qildi. Moliya vazirligining baholashicha, bu bank Eron rejimiga AQSH dollarini yetkazib beruvchi asosiy yo‘lak bo‘lib xizmat qilgan."
"Chetlatilgan iqtisodiyot" (Economic Outcast) operatsiyasi 24-avgust kuni Moliya vaziri Skott Bessent tomonidan e’lon qilingan edi. Bu Vashingtonning Hormuz bo‘g‘ozidagi ziddiyat fonida Eronga bosim o‘tkazish harakatlarining bir qismidir.
Moliya vazirligining bildirishicha, Amerika banklari Banque Misr UAE ishtirok etgan har qanday pul o‘tkazmalarini to‘xtatishi shart. Shuningdek, ular xorijiy banklar bilan ishlayotganda ushbu bankka aloqador operatsiyalarni alohida sinchkovlik bilan tekshirishi lozim.
28-avgustdagi e’lon Dubaydagi Bank Melli filialiga ham tegishli bo‘ldi. AQSH uning menejeri Rizo Muhammad Tayediyga nisbatan sanksiya kiritgan. Bank Melli Eronning yirik tijorat banki bo‘lib, 1979-yilgi inqilobgacha markaziy bank vazifasini bajargan. Uning Yevropa va Yaqin Sharqda filiallari mavjud.
Moliya vazirligi ma’lumotlariga ko‘ra, "Bank Melli Eron qurolli kuchlari, jumladan, AQSH sanksiyalari ostida bo‘lgan Islom inqilobi qo‘riqchilari korpusining 'Quds' kuchlari hamda Mudofaa va qurolli kuchlar logistikasi vazirligi uchun muhim moliya markazi vazifasini o‘tagan."
Shuningdek, Gonkongda joylashgan Kameng Trading Limited kompaniyasiga ham sanksiya qo‘llanildi.
Bayonotda aytilishicha, "Sanksiyaga tushgan Eronning Pedram Pirouzan Exchange House (shuningdek Opal Exchange nomi bilan tanilgan) valyuta ayboshlash shoxobchasi Eron uchun pullarni yuvishda Kameng Trading Limited’dan foydalangan."