AQSH Eronga qarshi sanksiyalarni kuchaytirishga tayyorlanmoqda
AQSH Eronning iqtisodiy izolyatsiyasini yanada kuchaytirish maqsadida Tehron bilan hamkorlik qilayotgan shaxslar, kompaniyalar va savdo kemalariga qarshi yangi sanksiyalar joriy etishga tayyorlanmoqda. Vashington 60 dan ortiq yuridik va jismoniy shaxs hamda kemani sanksiyalar roʻyxatiga kiritishi mumkin. Shuningdek, raqamli aktivlar, texnologiyalar, oltin, aviatsiya va dengiz tashuvlari sohalarida Eron bilan ishlayotganlarga ikkilamchi sanksiyalar qoʻllash imkoniyati koʻrib chiqilmoqda.
AQSH Eronning iqtisodiy hamkorlariga bosimni kuchaytirish orqali sanksiyalarni yanada kuchaytirishga tayyorlanmoqda. Bu haqda 24-avgust kuni boʻlib oʻtgan matbuot anjumanida AQSH moliya vaziri Skott Bessent maʼlum qildi.
Vazirning soʻzlariga koʻra, Eron bilan iqtisodiy aloqalarni davom ettirayotgan tomonlar AQSHning sanksiya choralariga duch kelishi mumkin. Bessentning taʼkidlashicha, AQSH Moliya vazirligi Eron neftini noqonuniy sotish va amaldagi sanksiyalarni chetlab oʻtishda foydalanilgan asosiy markazlar, vositachilar va tarmoqlarni aniqlagan.
**60 dan ortiq shaxs, tashkilot va kema sanksiyaga tushishi mumkin**
AQSH tomoni 60 dan ortiq yuridik va jismoniy shaxs, shuningdek, dunyoning turli hududlarida faoliyat yuritayotgan savdo kemalariga sanksiya joriy etish imkoniyatini koʻrib chiqmoqda. Vashingtonning daʼvosiga koʻra, ushbu tarmoqlar orqali Tehron yadroviy va raketa texnologiyalarini qoʻlga kiritgan, neft savdosidan daromad olgan va kiberoperatsiyalarni amalga oshirgan.
Biroq Bessent qaysi davlatlar, kompaniyalar yoki shaxslar yangi "qora roʻyxat"ga kiritilishi mumkinligini ochiqlamagan. Matbuot anjumanida undan Eron neftining asosiy xaridori hisoblangan Xitoyga nisbatan ham sanksiyalar qoʻllanishi mumkinmi, deb soʻralgan. Bessent bunga aniq javob bermagan, biroq hech kim Vashingtonning bu boradagi qatʼiyatini sinab koʻrmasligi kerakligini taʼkidlagan.
**Vashington Eron hamkorlaridan "zudlik bilan harakat" kutmoqda**
AQSH Eron bilan hamkorlik qilishda gumon qilinayotgan davlatlar va tashkilotlardan muayyan iqtisodiy aloqalarni toʻxtatish boʻyicha tezkor choralar koʻrishni talab qilmoqda. Bessentning aytishicha, AQSH Moliya vazirligi, Davlat departamenti va Mudofaa vazirligi vakillari dunyo boʻylab hamkor davlatlar bilan aloqada boʻlib turibdi.
Har bir mamlakatga Eron bilan bogʻliq muayyan faoliyatni toʻxtatish uchun alohida muddat berilishi rejalashtirilgan. Agar belgilangan talablar bajarilmasa, Vashington tegishli choralarni koʻradi. Ayni paytda AQSH tomoni bu muddatlar qancha boʻlishini ochiqlamagan. Shuningdek, talablarni bajarmagan alohida mamlakatlarga nisbatan aynan qanday choralar koʻrilishi ham maʼlum qilinmagan.