AQSh dronlar importiga yangi tariflar joriy etdi
AQSh prezidenti Donald Tramp mamlakatga import qilinadigan dronlar va ularning butlovchi qismlariga yangi boj tariflarini joriy etish to‘g‘risidagi hujjatni imzoladi. Ayrim turdagi uchuvchisiz apparatlar uchun boj miqdori ular qiymatining 100 foizigacha yetadi.
AQSh dronlar importiga yangi tariflar joriy etdi
AQSh prezidenti Donald Tramp 13-avgust kuni dronlar va ularning butlovchi qismlari importiga boj joriy etish to‘g‘risidagi proklamatsiyani imzoladi. Bu haqda Oq uy matbuot xizmati xabar berdi.
Hujjatga ko‘ra, milliy xavfsizlik uchun alohida ahamiyatga ega bo‘lgan muayyan o‘lcham yoki imkoniyatlarga ega uchuvchisiz uchish apparatlariga 100 foizlik tarif qo‘llanadi. Bunday boj dronlarning dok-stansiyalari va ayrim muhim butlovchi qismlariga ham tatbiq etiladi.
Xususan, maksimal uchish og‘irligi 25 kilogrammdan yuqori bo‘lgan va teplovizorlar bilan jihozlangan dronlar uchun boj stavkasi mahsulot qiymatining 100 foizini tashkil etadi.
Maksimal uchish og‘irligi 25 kilogramm va undan kam bo‘lgan dronlarga esa 25 foizlik import boji belgilangan.
Biroq ayrim davlatlar uchun alohida stavkalar nazarda tutilgan. Yevropa Ittifoqi mamlakatlari, Yaponiya, Janubiy Koreya, Shveysariya, Tayvan va Lixtenshteyndan import qilinadigan dronlar hamda ularning butlovchi qismlariga 15 foizlik tarif qo‘llanadi. Buyuk Britaniya mahsulotlari uchun esa boj stavkasi 10 foiz etib belgilangan.
Yangi tariflar proklamatsiya imzolanganidan 21 kun o‘tib kuchga kiradi. AQSh milliy xavfsizligi uchun alohida ahamiyatga ega bo‘lmagan dron komponentlariga bojlar esa hujjat imzolanganidan 180 kun keyin qo‘llana boshlaydi.
Oq uy yangi tariflarning joriy etilishini milliy xavfsizlik manfaatlari bilan izohladi.
AQSh ma’muriyatiga ko‘ra, uchuvchisiz apparatlar zamonaviy qurolli mojarolarda muhim texnologiyaga aylangan va mamlakatning hozirgi hamda kelajakdagi harbiy operatsiyalari uchun katta ahamiyat kasb etadi.
Shu bilan birga, AQShda dronlar ishlab chiqarish muhim butlovchi qismlarni yetkazib beruvchi xorijiy kompaniyalarga bog‘liq bo‘lib qolayotgani milliy va kiberxavfsizlik nuqtai nazaridan xavf tug‘dirayotgani ta’kidlangan.
Shu sababli Vashington dronlarni mamlakat ichida ishlab chiqarish hajmini tez sur’atlarda oshirishni maqsad qilgan.
AFP agentligi yangi tariflar haqidagi xabarida Xitoyning jahon dron sanoatidagi katta ulushiga e’tibor qaratgan.
Yaqinda The Telegraph nashri Buyuk Britaniya harbiy-dengiz kuchlariga tegishli dengiz razvedka dronlari Xitoyda ishlab chiqarilgan komponentlar sabab ma’lumotlarni Xitoyga yashirincha uzatgani haqida xabar bergan edi.
Shuningdek, Bloomberg agentligi fevral oyida Xitoy dronlari Rossiyaga Tailand orqali yetkazib berilgani haqida yozgan. Agentlik ma’lumotlariga ko‘ra, 2025-yilning 11 oyi davomida Rossiya Tailanddan 125 million dollarlik uchuvchisiz apparatlarni import qilgan.
Bloomberg avvalroq Xitoy ayrim muhim dron komponentlarini G‘arb mamlakatlariga yetkazib berishni qisqartirib, ayni paytda Rossiyaga bunday mahsulotlar eksportini oshirgani haqida ham xabar bergan.
AQSh ma’muriyati yangi tariflar orqali xorijiy yetkazib beruvchilarga qaramlikni kamaytirish, ichki dron sanoatini rivojlantirish va milliy xavfsizlik uchun muhim texnologiyalarni mamlakatda ishlab chiqarishni rag‘batlantirishni ko‘zlamoqda.