AQSh Demokratlari Donald Trampga qarshi keng koʻlamli tergovlar tayyorlamoqda

2 soat oldin

AQSh Vakillar palatasidagi demokratlar noyabr oyidagi oraliq saylovlarda gʻalaba qozongan taqdirda, prezident Donald Tramp, uning maʼmuriyati va oilasiga nisbatan tergov olib borishning yirik rejasini ishlab chiqmoqda. Qonunchilar eʼtibori markazida Tramp oilasining daromadlari, davlat apparatini isloh qilish, hukumat tomonidan berilgan afvlar va tashqi siyosat boʻladi.

Demokratik partiya vakillari va asosiy qoʻmitalar xodimlari Trampning oʻsib borayotgan boyligini, uning federal idoralarga taʼsirini va siyosiy raqiblarini taʼqib qilishini tekshirishga qaratilgan kun tartibini shakllantirmoqda. Tekshiruvlarni tayyorlash uchun qonunchilar allaqachon tashqi ekspertlar va sohaviy tashkilotlarni jalb qilmoqda.

Tramp oilasi daromadlarini tergov qilish doirasida qonunchilar xorijdan kelib tushgan moliyaviy mablagʻlarni oʻrganishni rejalashtirgan. Kongressmen Robert Garsiyaning maxsus trekeri maʼlumotlariga koʻra, Trampning ikkinchi muddati birinchi yilida xorijiy toʻlovlar 2,25 milliard dollarni tashkil etgan. Kongressmen Jemi Raskin kichik Donald Tramp va Erik Tramp bilan bogʻliq boʻlgan 1789 Capital va American Ventures venchur firmalarining investitsiyalarini, shuningdek, Truth Social platformasi bitimlarini va Jared Kushnerning biznesini tekshirmoqchi.

Bundan tashqari, afv etish toʻgʻrisidagi qarorlar ham nazoratga olinadi. Qonunchilarni 38 million dollarlik firibgarlik uchun hukm qilinganidan keyin afv etilishini lobbi qilishga qariyb 1 million dollar sarflagan tadbirkor Jozef Shvarts ishi qiziqtirib qoldi. Shuningdek, Trampning donoriga tegishli boʻlgan Luizianadagi suyultirilgan tabiiy gaz loyihasiga investitsiya kiritishi shart boʻlgan Germaniya energetika kompaniyasi bilan tuzilgan 1,2 milliard dollarlik kelishuv ham tekshiriladi.

Ichki ishlar sohasida qonunchilar Oq uy va Kennedi markazini rekonstruktsiya qilish loyihalarini, shuningdek, immigratsiya xizmatlarining harakatlarini tekshirish niyatida. Minneapolisdagi hodisalar, saqlash markazlarida fuqarolarning halok boʻlishi va Kristi Noem rahbarligidagi Ichki xavfsizlik vazirligi shartnomalari tekshiruvlarga sabab boʻldi.

Davlat apparatini isloh qilish, razvedkadagi kadrlar tozalovi, DOGE xizmatidagi ommaviy ishdan boʻshatishlar, AQSh Xalqaro taraqqiyot agentligini (USAID) tugatish va Taʼlim vazirligini tarqatib yuborishga alohida eʼtibor qaratish rejalashtirilgan. Demokratlar, shuningdek, siyosiy raqiblarning jinoiy taʼqib qilinishi faktlarini va "hokimiyatdan qurol sifatida foydalanish"dan jabr koʻrganlarga tovon toʻlash uchun 1,8 milliard dollarlik jamgʻarma tashkil etishning muvaffaqiyatsiz urinishini oʻrganish niyatida.

Tijorat va davlat institutlariga, jumladan, yuridik firmalar, Apple va Google kompaniyalariga boʻlgan bosim, shuningdek, Devid Ellison tomonidan Paramount mediaxoldingining sotib olinishi ham diqqat markazida boʻladi. Tashqi siyosatda qonunchilar Stiv Uitkoff va Jared Kushnerning diplomatik faoliyatini tekshirishni rejalashtirmoqda va BAA investorlari ularning kriptokompaniyasidagi 500 million dollarlik ulushni sotib olgani sababli yuzaga kelishi mumkin boʻlgan manfaatlar toʻqnashuviga ishora qilmoqda. Qoʻshimcha ravishda Jeffri Epshteyn ishi boʻyicha yangi eshituvlar oʻtkazish rejalashtirilgan.

Oq uy vakillari demokratlarning rejalarini prezident kun tartibiga toʻsqinlik qilishga urinish deb atadi. Matbuot kotibi Anna Kelli Uitkoff kriptobiznesdan chiqqanini va uning faoliyati AQSh manfaatlarini samarali ilgari surayotganini aytdi. Maʼmuriyat allaqachon himoyaning huquqiy mexanizmlarini, jumladan, ijro etuvchi imtiyozdan foydalanishni ishlab chiqmoqda. Shu bilan birga, kongressmen Jim Xayms hamkasblarini Robert Myuller tergovi tajribasini eslatib, jamoatchilik kutishlarini haddan tashqari oshirib yubormaslikka chaqirdi.