AQSH armiyasi uchun 850 ta F-35 rejalashtirilmoqda
Pentagon va Lockheed Martin AQSH qurolli kuchlari uchun oʻn yil davomida kamida 850 ta F-35 qiruvchisini ishlab chiqarish va ularga xizmat koʻrsatishni nazarda tutuvchi doiraviy kelishuv tuzdi. Dasturni amalga oshirish uchun Kongressning roziligi va mablagʻ ajratishi talab etiladi.
AQSH armiyasi uchun 850 ta F-35 rejalashtirilmoqda
DW xabariga ko‘ra, kelishuv 22-oktabr kuni imzolangan. U samolyotlarni ishlab chiqarish bilan birga, ehtiyot qismlar va modernizatsiya to‘plamlarini yetkazib berish, shuningdek, F-35 parkiga texnik xizmat ko‘rsatishni ham o‘z ichiga oladi.
Kelishuv shartlariga ko‘ra, Lockheed Martin F-35 dasturini rivojlantirishga kamida 7 milliard dollar sarmoya kiritadi.
Kompaniya amerikalik va xorijiy buyurtmachilar uchun yiliga jami 156 ta samolyot ishlab chiqarish hajmini saqlab qolishni rejalashtirmoqda. Bu ko‘rsatkich faqat AQSH qurolli kuchlari uchun mo‘ljallangan 850 ta samolyot bilan cheklanmaydi, balki xalqaro buyurtmalarni ham qamrab oladi.
Hozircha bu hujjat yakuniy yetkazib berish shartnomasi emas. Agar Kongress ko‘p yillik xarid dasturini ma’qullasa, tomonlar narxlar, yetkazib berish muddatlari va boshqa shartlarni keyinroq kelishib olishi kerak bo‘ladi.
Pentagon bahosiga ko‘ra, uzoq muddatli kelishuv ishlab chiqarish quvvatlarini kengaytirish va AQSH mudofaa sanoatini mustahkamlashga yordam beradi.
Lockheed Martin rahbari Jim Tayklet esa hukumatning uzoq muddatli majburiyatlari kompaniyaga ishlab chiqarish va ta’minot zanjirlariga sarmoya kiritish imkonini berishini ta’kidlagan.
F-35 AQSH va bir qator ittifoqchi davlatlarning qo‘shma loyihasi hisoblanadi. Ishlab chiqaruvchi ma’lumotiga ko‘ra, dunyo bo‘ylab ushbu turdagi 1375 tadan ortiq samolyotdan foydalanilmoqda. Yangi kelishuv xalqaro buyurtmalarni ham qamrab oladi.
AFP agentligi bu qiruvchilarga xorijda ham qiziqish saqlanayotganini qayd etgan. Sentabrda AQSH Saudiya Arabistoniga 24,3 milliard dollarlik 48 ta F-35 sotilishini ma’qullagan.
Rossiyaning S-400 havo hujumidan mudofaa tizimlarini xarid qilganidan keyin 2019-yilda F-35 dasturidan chiqarilgan Turkiya ham avvalroq ushbu samolyotlarni olish imkoniyati tiklanishiga umid bildirgan edi.