Anthropic rahbari OpenAI ortidan sunʼiy intellekt rivojlanishini zudlik bilan sekinlashtirishga chaqirdi
Anthropic rahbari OpenAI ortidan sunʼiy intellekt rivojlanishini zudlik bilan sekinlashtirishga chaqirdi
Anthropic rahbari Dario Amodei xavfsizlikka tahdid solayotgan xavf-xatarlar tufayli sunʼiy intellektning rivojlanish surʼatlarini zudlik bilan sekinlashtirish zarurligini maʼlum qildi. Uning baholashicha, agar tegishli himoya choralari koʻrilmasa, kuchli SI tizimlari yaqin 6-12 oy ichidayoq yuzlab milliard dollarlik zarar yetkazishi mumkin.
Claude til modeli yaratuvchisi oʻz blogida SI imkoniyatlarining tezlashib borayotgan rivojlanishi internetni egallab olishi mumkin boʻlgan botlar toʻdasi paydo boʻlishi xavfini tugʻdirishini koʻrsatib oʻtdi. U agar zarur himoya mexanizmlari joriy etilmasa, algoritmlar quvvatining oshishi bilan birga potentsial zarar koʻlami ham oʻsib borishini taʼkidladi.
Ushbu muammoni hal qilish uchun Amodei texnologiyalarning muvozanatli va xavfsiz rivojlanishiga qaratilgan uch bosqichli muvofiqlashtirish rejasini taklif qildi. Birinchi bosqichda ishlab chiquvchi kompaniyalar ichki xavfsizlik amaliyotini auditdan oʻtkazish uchun tashqi ekspertlarni jalb qilishlari kerak.
Ikkinchi bosqich demokratik mamlakatlardagi SI kompaniyalari oʻrtasida hamkorlikni yoʻlga qoʻyishni nazarda tutadi. Uchinchi bosqich esa dunyoning aksariyat mamlakatlari, jumladan, Xitoy kabi avtoritar davlatlar hukumatlari ishtirokidagi global muvofiqlashtirishni nazarda tutadi.
Anthropic rahbarining bayonoti OpenAI rahbariyatining shunga oʻxshash pozitsiyasi fonida yangradi. Avvalroq kompaniya rahbari Sem Altman xodimlar bilan yopiq uchrashuvda xavfsizlik yoʻlida eng ilgʻor sunʼiy intellekt tizimlarini ishlab chiqishni sekinlashtirishga tayyorligini maʼlum qilgan va bozorning boshqa ishtirokchilarini ham ushbu namunaga ergashishga chaqirgan edi.