Annalena Berbok Nyu-Yorkda professor boʻladi
Germaniyaning sobiq tashqi ishlar vaziri, hozirda BMT Bosh assambleyasi raisi lavozimida ishlayotgan Annalena Berbok vakolat muddati yakunlanganidan keyin Nyu-Yorkdagi Kolumbiya universitetida dars beradi. Uning universitet bilan hamkorligi uch yilga moʻljallangan.
Annalena Berbok Nyu-Yorkda professorlik faoliyatini boshlaydi
24-avgust kuni Table Briefings nashri Germaniyaning «Ittifoq-90/Yashillar» partiyasidagi manbalarga tayanib xabar berishicha, Annalena Berbok BMT Bosh assambleyasi raisi sifatidagi vakolati tugagach, Kolumbiya universitetida oʻqituvchilik faoliyatini boshlaydi. Berbok hozir ham «Yashillar» partiyasi aʼzosi hisoblanadi.
OAV maʼlumotlariga koʻra, u Kolumbiya universitetining Xalqaro va jamoatchilik bilan aloqalar maktabi - SIPAʼda tashkil etilgan Master of Public Administration in Global Leadership («Global yetakchilik sohasida davlat boshqaruvi magistri») dasturining hamrahbari boʻladi.
DPA agentligi qayd etishicha, bu amaliy faoliyatga yoʻnaltirilgan professorlik lavozimi boʻlib, klassik ilmiy-tadqiqot kafedrasi hisoblanmaydi.
Berbokning Kolumbiya universiteti bilan hamkorligi uch yil davom etishi rejalashtirilgan. Shuningdek, u taklif etilgan lektor sifatida darslar oʻtishi va ommaviy maʼruzalar bilan chiqish qilishi kutilmoqda.
Annalena Berbok BMT Bosh assambleyasi raisi lavozimiga kirishganidan keyin Germaniyadan Nyu-Yorkka koʻchib oʻtgani unga maʼqul kelganini aytgan edi.
Uning soʻzlariga koʻra, Nyu-Yorkda inson shaharning xilma-xilligi ichida «singib ketishi» mumkin. Berbok bu holat baʼzan unga katta yengillik berishini ham taʼkidlagan.
Berbok 2025-yil sentabridan beri BMT Bosh assambleyasi raisi lavozimida ishlab kelmoqda. Biroq ushbu lavozim doimiy emas - Bosh assambleya raisi bir yillik muddatga saylanadi.
Nazariy jihatdan nomzodlar qayta saylanishi mumkin boʻlsa-da, BMTdagi ichki tartiblar, xususan, nomzodlarni mintaqaviy rotatsiya asosida koʻrsatish amaliyoti bir shaxsning ketma-ket ikki muddat lavozimda qolishi uchun sharoit yaratmaydi.
Sentabr oyi boshida Berbokning vakolatlari Bangladesh vakili Xalilur Rahmonga oʻtadi. U ham Berbok singari avval oʻz mamlakati tashqi ishlar vaziri lavozimida ishlagan.
Annalena Berbok Germaniya tashqi ishlar vaziri lavozimidan keyin AQShda akademik faoliyat bilan shugʻullanadigan birinchi nemis siyosatchisi emas.
Undan avval Germaniyaning sobiq vitse-kansleri va tashqi ishlar vaziri Yoshka Fisher ham shunday yoʻlni tanlagan. Fisher 1998–2005-yillarda Germaniya tashqi ishlar vaziri boʻlgan va Berbok singari «Yashillar» partiyasi vakili edi.