Angrenlik fuqaro elektron bazadagi "ikkinchi xotin" bilan bogʻliq xatolik tufayli bir yarim yildan beri uyini sota olmayapti
Angrenlik fuqaro elektron bazadagi xatolik tufayli unga «ikkinchi xotin» yozib qoʻyilgani sababli bir yarim yildan beri uyini sota olmayapti.
Toshkent viloyatining Angren shahrida yashovchi fuqaro uyini sotish chogʻida kutilmagan muammoga duch keldi — elektron maʼlumotlar bazasida uning ikkinchi xotini borligi haqida yozuv paydo boʻlgan. Tizimdagi xatolik tufayli erkak 1,5 yildan beri oldi-sotdi shartnomasini rasmiylashtira olmayapti va xotini yoʻqligini isbotlay olmayapti.
Bu gʻalati vaziyat uyni sotish uchun hujjatlarni rasmiylashtirish maqsadida notariusga borilganda maʼlum boʻlgan. Davlat elektron tizimi orqali shaxsiy maʼlumotlar tekshirilganda, fuqaro oʻzi tanimagan ayol bilan rasman nikohda ekani aniqlangan.
Angrenlik fuqaroning oʻzi ushbu ayol bilan hech qachon nikohdan oʻtmaganini, toʻy qilmaganini va hatto uni koʻrmaganini taʼkidlamoqda. Shunga qaramay, ushbu maʼlumot FHDYo organlari, notariuslar va boshqa davlat idoralari bazalarida qayd etilgan.
Nikoh toʻgʻrisidagi yozuvning mavjudligi koʻchmas mulk oldi-sotdi shartnomasini tuzishga toʻsiq boʻldi. Erkak 1,5 yildan beri turli idoralarda yuzaga kelgan muammoni hal qilishga urinmoqda.
U ikki marta sudga daʼvo arizasi bilan murojaat qilgan, biroq uning talablari rad etilgan. Hozirgi vaqtda fuqaro hanuzgacha bazadan xato maʼlumotlarni oʻchira olmayapti va mulk sotuvini yakunlay olmayapti.