Andijonda Labo yukxonasida olti nafar bolani tashigan haydovchi jarimaga tortildi
Andijonda Labo avtomobilining yukxonasida olti nafar bolani olib ketgan 26 yoshli haydovchiga 840 ming so‘m jarima va 0,3 jarima bali belgilandi. Bolalar haydovchining qarindoshlari bo‘lgan.
Andijonda Labo yukxonasida olti nafar bolani olib ketgan haydovchi jarimaga tortildi
Andijon viloyatining Marhamat tumanida Labo rusumli avtomobilning yukxonasida olti nafar voyaga yetmagan bolani tashigan haydovchiga nisbatan chora ko‘rildi.
Bu holat ijtimoiy tarmoqlarda tarqalgan video orqali aniqlangan. Viloyat IIB Yo‘l harakati xavfsizligi boshqarmasi vakillari voqeani o‘rganib chiqqan.
Hodisa Marhamat tumanidagi Buyuk Turon ko‘chasi, 23-sonli davlat maktabgacha ta’lim tashkiloti ro‘parasida yuz bergan. Tekshiruv davomida 26 yoshli haydovchi Labo avtomobilining yuk tashish qismida olti nafar voyaga yetmagan bolani olib ketgani ma’lum bo‘lgan. Bolalar haydovchining qarindoshlari ekani aniqlangan.
Haydovchining aytishicha, u 2026-yil 29-sentabr kuni otasiga sovg‘a qilish uchun Labo rusumli avtomobil sotib olgan va uni olib ketayotganda jiyanlarini mashinasining orqa qismiga joylashtirgan. U qilgan ishidan pushaymonligini bildirgan.
Haydovchiga Ma’muriy javobgarlik to‘g‘risidagi kodeksning 128−8-moddasi 1-qismi (Odam tashish qoidalarini buzish) asosida BHMning 2 baravari — 840 ming so‘m miqdorida jarima qo‘llangan. Bundan tashqari, unga 0,3 jarima bali belgilangan.
Holat yuzasidan haydovchiga qonuniy chora ko‘rilgan. Muassasa mudirasiga esa bolalarni bunday tarzda tashishning xavfli oqibatlari tushuntirilgan. Hujjatlar viloyat Maktab va maktabgacha ta’lim boshqarmasiga yuborilgan.