Amerika bozoriga eng koʻp bogʻliq iqtisodiyotlar maʼlum boʻldi
AQSH bilan tovar savdosi Meksika yalpi ichki mahsulotining 48 foiziga, Vetnamning 44 foiziga teng. Xitoyda esa bu nisbat atigi 2 foizni tashkil etadi. Visual Capitalist infografikasi Amerika bilan savdoning turli iqtisodiyotlar uchun ahamiyati qanchalik farq qilishini koʻrsatdi.
Amerika bozoriga eng kuchli bogʻlangan iqtisodiyotlar aniqlandi
Xaritada 2025-yilda har bir davlatning AQShga qilgan tovar eksporti va undan importi jami yalpi ichki mahsulotga nisbatan hisoblab chiqilgan. Xizmatlar savdosi bu koʻrsatkichga kiritilmagan.
Maʼlumotlar AQSH Aholini roʻyxatga olish byurosi, AQSH Xalqaro savdo komissiyasi, Jahon savdo tashkiloti va Xalqaro valyuta jamgʻarmasi manbalariga tayangan.
Muhim jihati shuki, savdo hajmining YaIMga nisbati iqtisodiyotning aynan shu qismi AQSH hisobiga yaratilishini bildirmaydi. Bu koʻrsatkich ikki tomonlama tovar ayirboshlash miqyosini mamlakat iqtisodiyoti hajmi bilan solishtiradi.
**Meksika va Kanada: qoʻshni bozorning roli katta**
Meksikaning AQSH bilan tovar savdosi uning YaIMiga nisbatan 48 foizni tashkil etgan. Kanadada esa bu koʻrsatkich 31 foizga teng.
Iqtisodiyoti hajmi bir trillion dollardan oshadigan davlatlar orasida ular reytingning birinchi oʻntaligiga kirgan yagona ikki mamlakatdir.
Kanada uchun energetika savdosi alohida ahamiyatga ega. Maqolada qayd etilishicha, 2025-yilda mamlakat xom neft eksportining 90,1 foizi AQSH hissasiga toʻgʻri kelgan.
**Vetnam va Tayvan eksporti keskin oshgan**
Vetnam tashqi savdoga juda kuchli tayanadi: 2025-yilda uning barcha davlatlar bilan eksport va importi yigʻindisi YaIMning 190 foiziga teng boʻlgan.
AQSH Vetnam tovarlari uchun eng yirik bozor hisoblanadi. Ikki tomonlama tovar savdosi Vetnam YaIMining 44 foiziga teng. Yirik iqtisodiyotlar ichida bu nisbat boʻyicha faqat Meksika oldinda.
2025-yilda Vetnamning AQShga eksporti 28,1 foizga oshib, 153 milliard dollardan yuqorilagan. Bunda kompyuterlar va elektron texnika muhim oʻrin tutgan. Maqolada bu oʻsish Amerika kompaniyalarining ishlab chiqarish zanjirlarida Xitoyga bogʻliqlikni kamaytirish harakatlari bilan ham izohlangan.
Tayvanning AQSH bilan tovar savdosi esa YaIMning 28 foiziga teng. Uning Amerikaga eksporti 2025-yilda 78 foizga koʻpayib, 198,3 milliard dollarga yetgan.
Tailandda AQSH bilan savdoning YaIMga nisbati 20 foiz, Malayziyada esa 19 foizni tashkil etgan. Vetnam, Tayvan, Tailand va Malayziya global elektronika taʼminot zanjirlarining muhim markazlari hisoblanadi.