Aksa O‘zbekistonning yana uchta viloyati elektr tarmoqlarini boshqaruvga olishni rejalashtirmoqda
Turkiyaning Aksa Enerji kompaniyasi bir hafta ichida Toshkent, Sirdaryo va Jizzax viloyatlari elektr tarmoqlari bo‘yicha kelishuvlarni imzolashni rejalashtirmoqda. U yo‘qotishlarni kamaytirish uchun tarmoqlarga sarmoya kiritmoqchi. Avvalroq u Samarqand elektr tarmoqlari tenderida g‘olib chiqqandi.
Aksa O‘zbekistonning yana uchta viloyati elektr tarmoqlarini boshqaruvga olishni rejalashtirmoqda
Turkiyaning Aksa Enerji kompaniyasi bir hafta ichida Toshkent, Sirdaryo va Jizzax viloyatlarining taqsimlovchi elektr tarmoqlari bo‘yicha kelishuvlarni imzolashni rejalashtirmoqda. Bu haqda kompaniya direktorlar kengashi raisi Jamil Kazanji 16-oktabr kuni prezident Shavkat Mirziyoyev bilan uchrashuvdan keyin “O‘zbekiston 24” telekanaliga bergan intervyusida aytib o‘tdi.
Uning ta’kidlashicha, kompaniya yo‘qotishlarni qisqartirish, tannarxni tushirish va energiyadan foydalanish samaradorligini oshirish maqsadida taqsimlovchi tarmoqlarga sarmoya kiritmoqchi.
“Yig‘ilishda Toshkent, Sirdaryo va Jizzax viloyatlari bo‘yicha kelishuvlarimizni ham muhokama qildik. Ularni bir hafta ichida imzolashni rejalashtiryapmiz. Shu tariqa Samarqandda boshlangan faoliyatimizni ushbu hududlarda ham kengaytiramiz”, — dedi Kazanji.
Uning qayd etishicha, prezident bilan uchrashuvda kompaniya oldida turgan vazifalar aniqlashtirilgan.
“Bizga aholi manfaatlariga xizmat qiladigan loyihalar taqdim etildi. Endi ularni tez fursatda o‘rganib, o‘z takliflarimizni bildiramiz. Ushbu tashrifimiz aniq kelishuvlar bilan yakunlanishini istaymiz”, — dedi Aksa direktorlar kengashi rahbari.
Kazanjining so‘zlariga ko‘ra, hozirgacha Aksa Enerji O‘zbekistonga 750 mln dollar sarmoya kiritib, to‘rtta elektr stansiyasini qurgan.
“Kelgusida elektr energiyasi va gazni taqsimlash sohasida ham faoliyatimizni davom ettiramiz”, — dedi u.
Intervyuda uchta viloyat bo‘yicha rejalashtirilayotgan kelishuvlar parametrlari va kompaniyaning taqsimlovchi tarmoqlar ishida ishtirok etish shakli ochiqlanmagan.
Avvalroq Aksa Samarqand viloyatining taqsimlovchi elektr tarmoqlarini boshqarish bo‘yicha xalqaro tenderda g‘olib chiqqan edi. Viloyat hokimligi 9-oktabr kuni xabar berganidek, 30 yillik kelishuv doirasida investor mintaqa infratuzilmasiga 1 mlrd dollar yo‘naltirishni rejalashtirmoqda (dastlabki 12 yil ichida 357 mln dollar to‘g‘ridan-to‘g‘ri investitsiya jalb qilishi kerak). Loyiha past kuchlanishli tarmoqlarni loyihalash, moliyalashtirish, qurish, ekspluatatsiya qilish va ularga texnik xizmat ko‘rsatishni nazarda tutadi.
Hokimlik ma’lumotlariga ko‘ra, Turkiya tomoni tanqidiy uchastkalar auditini yakunlab, 440 ta loyihani ishlab chiqqan. Viloyatda 1000 ta transformatorni yangilash, eskirgan tayanch ustunlar va elektr uzatish tarmoqlarini almashtirish rejalashtirilmoqda. Shuningdek, mobil generatorlar va maxsus texnika xarid qilish masalasi ko‘rib chiqilmoqda.
Aksa O‘zbekistonda elektr energiyasi ishlab chiqarishda ham ishtirok etmoqda. Kompaniya Toshkent va Buxoro viloyatlarida umumiy quvvati 740 MVt bo‘lgan elektr stansiyalari qurish loyihalarini amalga oshirdi. 2024-yil dekabr oyida Qashqadaryo viloyatining Nishon tumanida 400 MVt quvvatga ega yana bir stansiyani ishga tushirish marosimi bo‘lib o‘tgan edi.