«AKFA Medline»da «Sen Yashaysan»: 9 yildan buyon bolalarga bepul yurak operatsiyalari o‘tkazilmoqda
Toshkent shahridagi «AKFA Medline» klinikasida tug‘ma yurak nuqsoni bilan dunyoga kelgan bolalarga yordam berishga qaratilgan
«AKFA Medline»da «Sen Yashaysan»: 9 yildan beri bolalarga bepul yurak operatsiyalari qilinmoqda
Toshkentdagi «AKFA Medline» klinikasida tug‘ma yurak nuqsoni bilan tug‘ilgan bolalarga yordam berishga yo‘naltirilgan «Sen Yashaysan» xayriya dasturi izchil davom etmoqda. Dastur doirasida 15 yoshgacha bo‘lgan, ijtimoiy ko‘makka muhtoj oilalar farzandlariga murakkab yurak operatsiyalari mutlaqo bepul amalga oshiriladi.
2017-yilda yo‘lga qo‘yilgan ushbu ezgu tashabbus bugunga kelib 9 yillik tarixga ega. Shu davr mobaynida «AKFA Medline» klinikasida «Sen Yashaysan» dasturi doirasida tug‘ma yurak nuqsoni bo‘lgan bolalarda 700 dan ortiq bepul jarrohlik amaliyoti bajarildi.
Bu ko‘rsatkichlar ortida yuzlab oilalarning umidi, ota-onalarning quvonchi va sog‘lom hayot sari qadam qo‘ygan bolalarning taqdiri mujassam.
Eng muhimi, dastur doirasidagi yordam faqat operatsiya bilan cheklanib qolmaydi. Jarrohlik amaliyoti, bolaning statsionarda davolanishi, shifoxonada bo‘lishi va ovqatlanishi, shuningdek, ota-onalardan birining farzandi yonida statsionarda qolishi ham bepul ta’minlanadi. Shu orqali oilalarning davolanish bilan bog‘liq moddiy tashvishlarini kamaytirishga alohida e’tibor qaratiladi.
Dasturda qatnashish uchun bolada tug‘ma yurak nuqsoni aniqlangan bo‘lishi hamda oila belgilangan ijtimoiy mezonlarga mos kelishi kerak. Har bir bemorning holati malakali bolalar kardiojarrohlari tomonidan alohida baholanib, operatsiya zarurligi tibbiy ko‘rsatmalar asosida belgilanadi.
Shuningdek, klinika tomonidan har oy bolalar kardiojarrohlarining bepul konsultatsiyalari o‘tkaziladi. Mutaxassislar respublikaning turli hududlariga ham borib, tug‘ma yurak nuqsoni bo‘lgan bolalarni ko‘rikdan o‘tkazadi va zarur hollarda bepul jarrohlik davolash uchun saralab oladi.
«AKFA Medline»da aholining ixtisoslashtirilgan tibbiy yordamdan foydalanish imkoniyatlarini kengaytirish maqsadida davlat orderi asosida davolanish ham yo‘lga qo‘yilgan. Ijtimoiy himoyaga muhtoj fuqarolar uchun «Saxovat va ko‘mak» jamg‘armasi orqali davolanish xarajatlarini qoplash imkoniyatlari ham belgilangan tartibda ko‘rib chiqiladi.
«Sen Yashaysan» dasturining asosiy maqsadi — moddiy imkoniyati cheklangan oilalardagi bolalarga o‘z vaqtida malakali tibbiy yordam ko‘rsatish, ularning sog‘lom ulg‘ayishi va to‘laqonli hayot kechirishi uchun imkon yaratishdir.
Zero, har bir bolaning yashashga, sog‘lom ulg‘ayishga va orzu qilishga haqqi bor.
Agar farzandingizda tug‘ma yurak nuqsoni aniqlangan bo‘lsa yoki shunday tashxisga shubha mavjud bo‘lsa, bepul konsultatsiya va dasturda ishtirok etish shartlari haqida ma’lumot olishingiz mumkin.