Afsonaviy avstraliyalik rok-yulduzning yoʻqolgan qoʻshiqlari garajdan topildi
Divinyls guruhi solisti Krissi Amflett ushbu qoʻshiqlarni 1998 yilda Split Enz guruhi aʼzosi Tim Finn bilan birga yozgan.
**Avstraliyalik afsonaviy rok-yulduzning yoʻqolgan qoʻshiqlari garajdan topildi**
**Krissi Amflett tomonidan 1998 yilda yozib olingan uchta qoʻshiq juma kuni chiqariladi**
Avstraliyalik rok afsonasi Krissi Amflett vafotidan 10 yildan koʻproq vaqt oʻtgach, garajdan topilgan uchta yoʻqolgan qoʻshiq tufayli uning ovozi yangicha yangraydi.
Divinyls guruhining peshqadami boʻlgan Amflettning oʻziga xos boʻgʻiq ovozi va sahnadagi jozibasi guruhning 1990 yildagi *I Touch Myself* nomli 1-raqamli xiti, shuningdek, undan oldingi *Pleasure and Pain* (1985) va *Boys in Town* (1981) kabi muvaffaqiyatli asarlarini taqdim etishga yordam bergan.
2013 yildagi vafotidan yillar oldin, yaʼni 1998 yilda Amflett Yangi Zelandiyaning Split Enz guruhi sobiq solisti Tim Finn bilan birgalikda uchta qoʻshiq yozib olgan edi. Finn 2023 yilda ularni oʻz garajidan topguniga qadar, bu treklar yoʻqolgan deb hisoblangan.
Qoʻshiqlar juma kuni *Some Times* deb nomlangan mini-albom (EP) sifatida chiqariladi.
Milliy teleradiokompaniya ABC’ning *Australian Story* hujjatli dasturiga bergan intervyusida Finn 1998 yilda Sidneyda Amflett bilan boʻlib oʻtgan ovoz yozish jarayonini yodga oldi.
«Uchrashishimiz uchun yaxshi vaqt edi, chunki u oʻz hayotida musiqiy jihatdan yangilik, boshqacharoq narsa izlayotgan edi», dedi Finn.
Hujjatli filmga koʻra, oʻsha paytda Amflett guruhdoshi va gitarachi Mark MakEnti bilan boʻlgan murakkab munosabatlariga chek qoʻygan va barabanchi Charli Dreyton bilan yaqinlashayotgan edi. Keyinchalik ular turmush qurishdi.
Bir necha kun davomida u va Amflett uchta qoʻshiq yozishdi va ularni yozib olish uchun studiyaga yoʻl olishdi, Dreyton esa barabanda oʻynadi.
«U juda diqqatli edi», dedi Finn. «U shunchaki hamma narsa mukammal boʻlishini xohlardi... Men buyuk isteʼdod va yuksak joziba sohibasi bilan birga edim».
Dushanba kuni ijtimoiy tarmoqdagi 1998 yilgi jarayon haqidagi postda Finn Amflettning ijodiga azaldan qoyil qolgani uchun u bilan bogʻlanganini aytdi.
«Biz ilgari uchrashmagan edik, lekin ikkita ajoyib guruhning sobiq solistlari sifatida umumiy tarixga ega ekanligimizni his qilib, darhol oʻrtamizda yaqinlik va hamfikrlik paydo boʻldi», deb yozdi Finn dushanba kuni.
Ovoz yozish jarayoni tugagach, Finn yozuvlarni uyiga olib ketgan va ular ustida ishlashni rejalashtirgan, biroq «ular hech qachon toʻliq yakuniga yetkazilmagan».
2023 yilda Dreyton 1998 yilgi yozuvlar boʻyicha Finn bilan bogʻlandi.
«Men ularni koinotda yoʻqolib ketgan deb oʻylagandim, lekin hayratlanarlisi, garajimdan ikki dyuymli tasmani topib oldim», deb yozdi Finn oʻz postida va bu qoʻshiqlarni «men, Charli va Krissiga yaqin boʻlganlar uchun juda muhim» deb atadi.
«U hali ham ideal holatda edi va biz endi bu qoʻshiqlarni siz bilan baham koʻrishga qodirmiz».