Abdulaziz Abdulxakov Yashnobod tumani hokimi bo‘ldi
Abdulaziz Abdulxakov Toshkentning Yashnobod tumani hokimi etib tasdiqlandi. U 2025-yildan buyon UET Construction kompaniyasining ijtimoiy obyektlarni qurish departamentini boshqarib kelayotgan edi. U bu lavozimda Baxtiyor Rahmonqulovning o‘rnini egalladi.
Abdulaziz Abdulxakov Yashnobod tumani hokimi etib tayinlandi
Abdulaziz Axatovich Abdulxakov Toshkent shahrining Yashnobod tumani hokimi lavozimiga tasdiqlandi. Bu haqda poytaxt hokimligi matbuot xizmati ma’lum qildi.
U 1980-yilda Toshkent shahrida tug‘ilgan. 2006-yilda Toshkent davlat texnika universitetini tamomlagan.
Mehnat faoliyati davomida hokimlik tizimida qurilish, arxitektura va kommunal xo‘jalik yo‘nalishlarida bir qator mas’ul lavozimlarda ishlagan.
2025-yildan boshlab Toshkentdagi UET Construction MCHJda ijtimoiy obyektlarni qurish departamenti direktori sifatida faoliyat yuritgan.
UET Construction — 2023-yilda Toshkentda tashkil etilgan muhandislik-qurilish kompaniyasi. U energetika, sanoat va infratuzilma obyektlarini loyihalash, jihozlar va materiallar bilan ta’minlash hamda qurish bilan shug‘ullanadi, Yangi Toshkent loyihalarida ishtirok etmoqda.
Bungacha Yashnobod tumaniga 2020-yil avgustda ushbu lavozimga tasdiqlangan Baxtiyor Rahmonqulov rahbarlik qilgan. U boshqa ishga o‘tishi munosabati bilan lavozimidan ozod etildi.
Tuman hokimi etib tayinlanguniga qadar Toshkent shahar hokimining o‘rinbosari — Uy-joy kommunal xizmat ko‘rsatish bosh boshqarmasi boshlig‘i lavozimida ishlagan.