80 yoshli aktyor Silvestr Stallone Trampning maxsus lavozimini rad etdi

80 yoshli aktyor Silvestr Stallone Tramp taklif qilgan maxsus lavozimni qabul qilmadi.

U bu tashabbus haqida teleyangiliklar orqali xabar topganini aytdi va o‘zi bilan birga hamkasblari Mel Gibson hamda Jon Voytning tayinlangani haqidagi xabarni ham shu tarzda eshitgan.

Aktyorning ta’kidlashicha, agar undan oldindan fikri so‘ralganida, u bu vazifani bajarib bo‘lmasligini aytgan bo‘lardi. U taklifga ochiqchasiga: “Rahmat va chao — chunki buning iloji yo‘q”, deb javob bergan.

Stallone rad javobini Gollivuddagi ish yuritish tizimi bilan izohladi. Uning qiyosiga ko‘ra, kino sanoati har birining o‘z mulki bo‘lgan feodal davlatlarga o‘xshaydi. “Oltita studiyaga kelib, ishlarni qanday yuritishni buyurib bo‘lmaydi”, dedi aktyor. Shuningdek, u hech bir top menejer aktyorning moliyaviy maslahatlariga quloq solmasligiga ishonchi komil ekanini bildirdi.

2025-yil yanvarida Tramp ijtimoiy tarmoqlar orqali Stallone, Mel Gibson va Jon Voyt kino ishlab chiqarishni chet eldan AQSHga qaytarish bo‘yicha maxsus elchilar bo‘lishini e’lon qilgandi. Gibson ham bu haqda oldindan ogohlantirilmagan va o‘z tayinlovini Trampning postidan bilib olgan.