70 ta medal va beshinchi oʻrin. Oʻzbekiston Osiyo oʻyinlarini qanday yakunladi
Oʻzbekiston Osiyo oʻyinlarini 70 ta medal — 21 ta oltin, 25 ta kumush va 24 ta bronza bilan yakunladi va beshinchi oʻrinni egalladi. Soʻnggi oltinni Tahmina Ikromova keltirdi. Terma jamoaga toʻrtinchi oʻrinni egallash uchun ikkita kumush medal yetmadi. Sovrindorlarga beriladigan mukofotlarning umumiy summasi deyarli 1 million dollarga baholanmoqda.
70 ta medal va beshinchi oʻrin. Oʻzbekiston Osiyo oʻyinlarini qanday yakunladi
Oʻzbekiston terma jamoasi Aichi-Nagoya Osiyo oʻyinlarining soʻnggi ikki kunida oʻz gʻaznasini yana beshta medal — bitta oltin, ikkita kumush va ikkita bronza bilan boyitdi. Barcha sovrinlar 3 oktyabr kuni qoʻlga kiritildi.
Yakunda Oʻzbekiston XX yozgi Osiyo oʻyinlarini 70 ta medal — 21 ta oltin, 25 ta kumush va 24 ta bronza bilan yakunladi. Umumiy hisobda jamoa beshinchi oʻrinni egalladi. Hindistonda ham 21 ta oltin bor edi, biroq u kumush medallar soni koʻpligi evaziga — 25 ga qarshi 27 ta — toʻrtinchi boʻldi.
Medallarning umumiy soni boʻyicha Oʻzbekiston Xanchjoudagi avvalgi Osiyo oʻyinlari koʻrsatkichini deyarli takrorladi: oʻshanda sportchilar 71 ta sovrin — bitta koʻp olishgandi. Aichi-Nagoyada oltin medallar bittaga kam, kumush medallar yettitaga koʻp, bronza medallar esa yettitaga kam boʻldi. Medallar jadvalidagi pozitsiya esa oʻzgarishsiz qoldi — beshinchi oʻrin.
Oʻzbekiston uchun medallar qoʻlga kiritilgan soʻnggi kun 3 oktyabr boʻldi. Sportchilar beshta sovrin — bitta oltin, ikkita kumush va ikkita bronzani qoʻlga kiritishdi. Shundan soʻng delegatsiyaning yakuniy natijasi 70 ta medalga yetdi.
Kunning bosh sovrinini Taxmina Ikromova keltirdi. Badiiy gimnastika vakilasi yakkalik koʻpkurashda 112,950 ball toʻplab, gʻolib chiqdi.
Bu Ikromova uchun faoliyatidagi uchinchi Osiyo oʻyinlari oltini boʻldi.
Xanchjoudagi avvalgi Osiyo oʻyinlarida u bir yoʻla ikkita oliy toifali sovrinni qoʻlga kiritgan edi. Avvaliga Ikromova, Vilana Savadyan va Evelina Atalyants tarkibidagi Oʻzbekiston terma jamoasi jamoaviy dasturda birinchi boʻldi, soʻngra Ikromova yakkalik koʻpkurashda ham 131,300 ball natija bilan gʻalaba qozondi.
Shu tariqa, Aichi-Nagoyada u shaxsiy koʻpkurashda chempionlik unvonini himoya qildi va uch karra Osiyo oʻyinlari chempioniga aylandi.
Taekvondo WT boʻyicha Marat Mavlonov kumush medalni qoʻlga kiritdi. U 80 kg dan yuqori vazn toifasidagi musobaqaning finaligacha yetib borib, unda Eron vakiliga imkoniyatni boy berdi.
Yana bir kumushni erkin kurashchi Sherzod Poyonov keltirdi. 97 kg gacha boʻlgan vazn toifasida u ham finalga chiqdi va eronlik raqibiga yutqazdi.
Ayollar oʻrtasidagi taekvondoda Svetlana Saidova (Osipova) bronza medaliga sazovor boʻldi. 67 kg dan yuqori vazn toifasi yarim finalida u Xitoy vakilasiga imkoniyatni boy berib, musobaqani uchinchi oʻrinda yakunladi.
Shu tariqa, faqatgina 3 oktyabr kunining oʻzida taekvondo Oʻzbekistonga ikkita — kumush va bronza medalini keltirdi.
Terma jamoa soʻnggi bronza medalini dzyudo boʻyicha aralash jamoaviy turnirda qoʻlga kiritdi.
Uchinchi oʻrin uchun kechgan bahsda Oʻzbekiston Janubiy Koreya bilan toʻqnash keldi va 4:2 hisobida gʻalaba qozondi. Oʻzbekiston jamoasi bilan birga shohsupaning uchinchi pogʻonasiga Xitoy ham koʻtarildi. Oltinni Yaponiya, kumushni Qozogʻiston qoʻlga kiritdi.
Ushbu sovrin oʻzbekistonlik dzyudochilarning Aichi-Nagoyadagi muvaffaqiyatli ishtirokiga yakun yasadi. Avvalroq ushbu sport turida Sita Qadamboyeva, Muzaffarbek Toʻraboyev, Abdurahim Nutfullayev, Shahram Ahadov, Samariddin Qoʻchqorov va Ernazar Sarsenbayev yakkalik bahslarida medallarni qoʻlga kiritishgan edi.
3 oktyabr kuni futbol boʻyicha Oʻzbekiston U-23 erkaklar terma jamoasining ham ishtiroki yakunlandi.
Uchinchi oʻrin uchun kechgan oʻyinda jamoa Xitoy bilan toʻqnash keldi. Raqib birinchi boʻlimda oldinga chiqib oldi, biroq 43-daqiqada Sardorbek Bahromov hisobni tenglashtirdi.
Ikkinchi boʻlimda Xitoy yana oldinga chiqdi, ammo 90-daqiqada zaxiradan maydonga tushgan Shodiyor Shodiboyev hisobni 2:2 koʻrinishiga keltirdi. Gʻolib penaltilar seriyasida aniqlandi, unda xitoylik futbolchilar aniqroq harakat qilishdi. Oʻzbekiston futbol turnirini toʻrtinchi oʻrinda yakunladi.
Avvalroq Oʻzbekiston jamoasi finalga chiqishga yaqin kelgandi. Yaponiyaga qarshi yarim finalda asosiy va qoʻshimcha vaqtlar 1:1 hisobida yakunlandi, shundan soʻng yaponlar uzoq davom etgan penaltilar seriyasida 9:8 hisobida gʻalaba qozonishdi.
Yakuniy medallar jadvalida birinchi oʻrinni 341 ta sovrin (shundan 169 tasi oltin) qoʻlga kiritgan Xitoy egalladi. Yaponiya 83 ta oltin medal bilan ikkinchi, Janubiy Koreya 39 ta oltin bilan uchinchi boʻldi.
Navbatdagi yozgi Osiyo oʻyinlari 2030 yilda Dohada boʻlib oʻtadi.
Qozogʻiston mutlaq koʻrsatkich boʻyicha koʻproq medal qoʻlga kiritdi — Oʻzbekistondagi 70 taga qarshi 84 ta, biroq oltin medallar soni kamroq boʻlgani uchun pastroqdan joy oldi.
Aichi-Nagoya Osiyo oʻyinlarida ishtirok etgan Oʻzbekiston delegatsiyasi 5 oktyabr kuni maxsus charter reysi bilan Toshkentga qaytib keldi.
Aeroportda sportchilarni bosh vazir Abdulla Aripov, hukumat, Sport vazirligi, Milliy olimpiya qoʻmitasi va Paralimpiya qoʻmitasi, poytaxt hokimligi vakillari, shuningdek, muxlislar kutib olishdi, deb xabar berdi Sport vazirligi.
Marosimda sportchilarga prezidentning tabrigi yetkazildi. Atletlar nomidan balandlikka sakrash boʻyicha Osiyo oʻyinlari chempioni Barnoxon Sayfullayeva va boks turniri gʻolibi Toʻrabek Habibullayev soʻzga chiqishdi.
Osiyo va Paraosiyo oʻyinlari medallari uchun Oʻzbekiston sportchilari va ularning murabbiylariga bir martalik pul mukofotlari koʻzda tutilgan. Toʻlovlar miqdori Moliya vazirligi, Markaziy bank va Sport vazirligining Adliya vazirligi tomonidan 1657-son bilan roʻyxatga olingan qoʻshma qarori bilan belgilangan.
Oltin medal uchun sportchi 25 ming dollar, murabbiy — 10 ming dollar oladi. Kumush uchun tegishli ravishda 12 ming va 5000 dollar, bronza uchun esa — 6250 va 2500 dollar koʻzda tutilgan.
Mukofotlar toʻlov kunidagi Markaziy bank kursi boʻyicha soʻmda toʻlanadi.
Agar har bir medal uchun belgilangan toʻlovlardan kelib chiqilsa, unda 21 ta oltin, 25 ta kumush va 24 ta bronza sovrinlari uchun Oʻzbekiston sportchilariga umumiy hisobda 975 ming dollar berilishi kerak.
Ushbu summaning 525 ming dollari oltin medallar, 300 ming dollari — kumush va 150 ming dollari — bronza medallar hissasiga toʻgʻri keladi. Bu faqat sportchilarga beriladigan toʻlovlar hisob-kitobi boʻlib, murabbiylarning mukofot pullari bunga kiritilmagan.