55 trillionga qarshi 35 trillion: G7 va BRICS iqtisodiyoti taqqoslandi
2026-yil uchun prognozlarga koʻra, «Katta yettilik» mamlakatlarining jami nominal yalpi ichki mahsuloti 55,3 trillion dollarga, infografikada BRICS tarkibida hisoblangan 11 davlatniki esa 35,2 trillion dollarga yetadi. Shu hisobda G7 iqtisodiyoti BRICS'dan qariyb 1,6 baravar katta.
55 trillionga qarshi 35 trillion: G7 va BRICS iqtisodiyoti solishtirildi
Taqqoslashda iqtisodiyotlar hajmi joriy narxlar asosida va AQSH dollarida ifodalangan nominal YAIM bo‘yicha baholangan.
Keltirilgan prognozlarga ko‘ra, 2026-yilda jahon iqtisodiyoti hajmi taxminan 126,3 trillion dollarga yetadi. Shundan qariyb 44 foizi G7 hissasiga, 28 foizi esa mazkur hisobdagi BRICS mamlakatlari ulushiga to‘g‘ri keladi.
BRICS tarkibida Xitoy katta tafovut bilan yetakchilik qilmoqda. Mamlakatning nominal YAIMi 20,85 trillion dollar atrofida bo‘lishi kutilmoqda. Bu birlashma uchun hisoblangan umumiy iqtisodiy hajmning qariyb 60 foizini tashkil etadi.
Ikkinchi o‘rinda Hindiston turibdi — uning YAIMi taxminan 4,15 trillion dollarga baholangan. Rossiya va Braziliyaning har biri uchun ko‘rsatkich qariyb 2,6 trillion dollarni tashkil etadi.
Infografikada ushbu to‘rt davlatdan tashqari Indoneziya, Saudiya Arabistoni, Birlashgan Arab Amirliklari, Janubiy Afrika Respublikasi, Misr, Eron va Efiopiya ham BRICS hisobiga kiritilgan.
«Katta yettilik»da esa AQShning ustunligi yaqqol ko‘rinadi. Uning nominal YAIMi 2026-yilda 32,38 trillion dollarga yetishi prognoz qilingan. Bu G7 umumiy iqtisodiyotining qariyb beshdan uch qismini tashkil etadi.
AQShdan keyin Germaniya turadi — uning iqtisodiyoti 5,45 trillion dollarga baholangan. Keyingi o‘rinlarda Yaponiya, Buyuk Britaniya, Fransiya, Italiya va Kanada joylashgan.
Biroq iqtisodiyotlarni xarid qobiliyati pariteti bo‘yicha taqqoslaganda natija o‘zgaradi. Ushbu usul mamlakatlardagi narxlar farqini hisobga oladi: bir xil miqdordagi pul turli davlatlarda qancha tovar va xizmat xarid qilish imkonini berishini inobatga oladi.
Bunday hisobda rivojlanayotgan mamlakatlar iqtisodiyotining hajmi odatda kattaroq ko‘rinadi. Jumladan, Xitoy xarid qobiliyati pariteti bo‘yicha YAIM hajmida AQShdan oldinda.
Mazkur infografika esa aynan nominal YAIMni taqqoslaydi. Shu sababli valyuta kurslarining o‘zgarishi ham mamlakatlarning dollardagi iqtisodiy hajmiga va reytingdagi o‘rniga sezilarli ta’sir qilishi mumkin.
Keltirilgan raqamlar 2026-yilning yakuniy natijalari emas, prognoz hisoblanadi. Yangi ma’lumotlar kelib tushishi bilan baholar qayta ko‘rib chiqilishi mumkin.