350 ming dollar evaziga fuqarolik: Argentina yangi dasturni boshlamoqda
Argentina hukumati investitsiya evaziga fuqarolik berish dasturini eʼlon qildi. Unda qatnashish uchun davlat gʻaznasiga qaytarilmaydigan 350 ming dollarlik badal kiritish yoki 800 ming dollarlik maxsus davlat obligatsiyasini sotib olish taklif etilmoqda. Arizalar 2026-yilning toʻrtinchi choragida qabul qilina boshlaydi.
350 ming dollar evaziga fuqarolik: Argentina yangi dasturni yoʻlga qoʻymoqda
DW xabariga koʻra, dastur haqidagi maʼlumot 2-oktabr kuni Argentinaning rasmiy davlat portalida eʼlon qilingan.
Dasturda qatnashishning ikki yoʻli belgilangan: birinchisi — davlat gʻaznasiga qaytarilmaydigan mablagʻ oʻtkazish, ikkinchisi — maxsus davlat obligatsiyasiga sarmoya kiritish.
Ariza beruvchilarning shaxsi va mablagʻlari tekshiruvdan oʻtkazilishi nazarda tutilgan.
Oila aʼzolari uchun qoʻshimcha badal toʻlanadi
Investorning turmush oʻrtogʻi va farzandlari ham fuqarolik olish uchun ariza topshirishi mumkin. Biroq ular uchun qoʻshimcha mablagʻ talab etiladi.
Turmush oʻrtogʻi, shuningdek, nikohdan oʻtmagan va farzandi boʻlmagan 18–25 yoshdagi har bir farzand uchun 100 ming dollardan qoʻshimcha badal belgilangan.
18 yoshga toʻlmagan har bir farzand uchun esa 25 ming dollar toʻlash kerak boʻladi.
Rasmiy bayonotda keltirilgan misolga koʻra, asosiy ariza beruvchi, uning turmush oʻrtogʻi va ikki nafar voyaga yetmagan farzandidan iborat oila jami 500 ming dollar toʻlab, Argentina fuqaroligiga ariza berishi mumkin. Bu hisob qaytarilmaydigan badal variantiga mos keladi.
Mablagʻ qayerdan olingani tekshiriladi
Argentina hukumati dastur doirasida pul yuvish va terrorizmni moliyalashtirishga qarshi xalqaro standartlarga rioya qilishini bildirgan.
Tekshiruvda ariza beruvchining shaxsi, obroʻ-eʼtibori, sudlanganlik holati va migratsiya tarixi oʻrganiladi.
Shuningdek, mablagʻlarning qonuniy kelib chiqishi hamda ular bogʻliq boʻlgan yurisdiksiyalar boʻyicha xavflar baholanadi.
Argentina dastur orqali sarmoya jalb qilmoqchi
Argentinada «oltin pasportlar» dasturini joriy etish rejalari haqida avvalroq Financial Times yozgan edi.
Nashrga koʻra, mamlakat shu yoʻl bilan yaqin yillardagi qarz majburiyatlarini qoplash uchun oʻnlab milliard dollar jalb qilishni koʻzlamoqda.