35 yillik tarix suratlarda: «Mustaqillik xotirasi» fotokoʻrgazmasi ochildi
Toshkentda Oʻzbekiston tarixining turli davrlarini aks ettirgan 150 dan ortiq fotosurat jamlangan koʻrgazma ochildi
35 yillik tarixni suratlarda aks ettiruvchi «Mustaqillik xotirasi» fotokoʻrgazmasi ochildi.
Bugun, 21 avgust kuni Toshkent Fotosuratlar uyida Oʻzbekiston Respublikasi mustaqilligining 35 yilligiga bagʻishlangan «Mustaqillik xotirasi» fotokoʻrgazmasining ochilish marosimi boʻlib oʻtdi. Koʻrgazma «Yagona Vatan, yagona xalq boʻlib, yangi hayot va kelajak yaratamiz!» gʻoyasi asosida tashkil etildi.
Ushbu tadbir Adliya vazirligi huzuridagi «Oʻzarxiv» agentligi, Oʻzbekiston Badiiy akademiyasi, Oʻzbekiston Milliy axborot agentligi, Toshkent Fotosuratlar uyi hamda Oʻzbekiston Kinofotofono hujjatlari milliy arxivi hamkorligida oʻtkazildi.
Ochilish marosimida Oʻzbekiston Badiiy akademiyasi raisi A. Nuriddinov, Oʻzbekiston Milliy axborot agentligi bosh direktori oʻrinbosari X. Xudoyberdiyev va «Oʻzarxiv» agentligi mutasaddilari soʻzga chiqishdi.
Koʻrgazmada mamlakatning 1928 yillardan buyongi tarixini aks ettiruvchi fotosuratlar oʻrin olgan. Ekspozitsiyada mustaqillikning ilk yillaridagi bayram tadbirlari, sanoat rivoji, xorijiy mamlakatlar bilan doʻstona aloqalar, taʼlim sohasidagi yutuqlar va sportchilarning xalqaro musobaqalardagi ishtirokini aks ettirgan kadrlar jamlangan.
Shuningdek, mehnat jarayoni, hunarmandlarning faoliyati va ular tayyorlagan mahsulotlardan namunalar, mamlakatning tarixiy va meʼmoriy obidalari tasvirlangan fotosuratlar ham namoyish etilmoqda.
Ekspozitsiyada 150 dan ortiq fotosurat mavjud. Ular orasida mustaqillik yillarida Oʻzbekiston hududlarida iqtisodiyot va maʼnaviyat sohalaridagi oʻzgarishlarni aks ettiruvchi kadrlar ham bor.