2027-yil tarixdagi eng issiq yil bo‘lishi mumkin
2027-yil kuzatuvlar tarixidagi eng issiq yil bo‘lishi mumkin. Bu haqda Kontroll.hu nashri Buyuk Britaniya Meteorologiya xizmatiga tayanib xabar berdi.
Ob-havo xizmatining prognozlariga ko‘ra, Tinch okeanida tarixdagi eng kuchli El Nino hodisasi yuz berishi kutilmoqda. Okeanning ayrim qismlarida suv yuzasi harorati o‘rtacha me’yordan 3 darajadan ko‘proqqa ko‘tarilishi mumkin.
Bu 1950-yildan beri olib borilayotgan kuzatuvlar tarixidagi eng yuqori ko‘rsatkich bo‘ladi. Aynan shu sababli kelayotgan yil rekord darajada issiq bo‘lishi kutilmoqda. Institutning uzoq muddatli prognozlar bo‘limi rahbari Adam Skeyf bu hodisani misli ko‘rilmagan holat deb atadi va ilgari bunday kuchli El Ninoni ko‘rmaganini ta’kidladi.
El Nino — har 2–7 yilda bir marta sodir bo‘ladigan va taxminan bir yil davom etadigan tabiiy iqlim hodisasi. Bu davrda Tinch okeani ustidan sharqdan g‘arbga esadigan shamollar kuchsizlanadi yoki yo‘nalishini o‘zgartiradi. Natijada iliq okean suvlari sharqqa qarab tarqaladi. Okeandan atmosferaga katta miqdorda issiqlik ajralib chiqadi, bu esa global haroratni oshiradi va yog‘ingarchilik tartibini o‘zgartirishi mumkin.
Olimlar Tinch okeanining muayyan hududida suv yuzasi harorati o‘rtacha ko‘rsatkichdan kamida 0,5 darajaga oshganda El Nino hodisasini qayd etadi. Hozirgi o‘lchovlar bu farq 2 darajadan oshganini ko‘rsatmoqda.
Bu 1950-yildan beri qayd etilgan eng kuchli El Nino hodisasidir. U hatto XIX asrdan beri eng qudratli hodisa bo‘lishi ham mumkin. Boshqa iqlim prognozlari esa harorat farqi 4 darajagacha yetadigan yanada keskin tebranishlarni bashorat qilmoqda. Avvalroq El Nino yaqinlashayotgani sababli Markaziy Osiyoda suv toshqini xavfi oshishi mumkinligi haqida xabar berilgandi.