200 dan ziyod fermer Misr tajribasini o‘rganish uchun yuboriladi
200 dan ziyod fermer Misr tajribasini o‘rganish uchun yuboriladi
200 dan ortiq fermer Misr tajribasini o‘rganish uchun yuboriladi
Qoraqalpog‘istonda 4 million 300 ming gektar yaylov maydoni mavjud. Shundan 2,5 million gektari aholi daromadini oshirish va chorva sonini ko‘paytirish uchun yetarli darajada foydalanilmayapti. Bu Prezident raisligidagi yig‘ilishda aytib o‘tildi.
«Beruniy Agrostar» Qo‘ng‘irot, Beruniy va Chimboyda aylanmadan chiqqan 2 ming gektar yerni qayta tiklab, uni ozuqa yetishtirishga moslashtirmoqda. Kelasi yili yana 5 ming gektar o‘zlashtiriladi. Bu 14 ming bosh qoramol uchun ozuqa bazasini yaratadi.
Bo‘zatovda ham 7,5 ming gektar yerni ozuqa yetishtirishga moslashtirish uchun 100 milliard so‘m ajratiladi. Ozuqa yetishtirishga har gektar uchun 500 ming so‘m subsidiya berish bo‘yicha o‘n kun ichida qaror kiritish topshirildi.
Misr tajribasini o‘rganish uchun 200 dan ziyod fermer, jumladan, qoraqalpog‘istonlik 26 nafar fermer ushbu davlatga yuborilgan. Dastlabki bosqichda Qoraqalpog‘istonning 20 ming gektar hududida Misr tajribasi joriy etiladi.
Cho‘l hududlarida ozuqa yetishtirishni ko‘paytirish maqsadida Misrdan mutaxassislar va texnologiyalar jalb qilinadi. Chorvachilik uchun Osiyo taraqqiyot bankidan olinayotgan 60 million dollar kredit va 8 million dollar grant birinchi navbatda shu loyihaga yo‘naltiriladi.
Chorvachilikda yirik komplekslar tashkil etish uchun qo‘shimcha imkoniyatlar yaratiladi.
May oyida chorva bosh sonini ko‘paytirishga 1 trillion 600 milliard so‘m resurs ajratilgan. Amalda 5 milliard so‘mgacha bo‘lgan loyihalarga o‘n yil muddatga 10 foizli kredit berilmoqda.
Qoraqalpog‘istonlik chorvadorlarning 1-2 ming boshli komplekslar tashkil etish uchun kredit miqdorini 50 milliard so‘mgacha oshirish haqidagi taklifi qo‘llab-quvvatlandi.
Beruniylik chorvadorlar samolyotda qoramol tashish kompensatsiyasi shartlari yengillashtirilsa, 5 ming bosh chorva olib kelishga tayyorligini bildirgan. Endi Qoraqalpog‘istonga samolyotda olib kelinadigan naslli buqalar qiymatining 10 foizi, har bir bosh uchun 4 million so‘mgacha subsidiya qilinadi.
Bir oy ichida joyi, tashabbuskori va mablag‘i aniq bo‘lgan kamida 100 ming boshli chorva komplekslari loyihalari shakllantiriladi. Qoramol xaridi uchun kredit ajratish tartibi yengillashtirilib, mablag‘lar tuman shtabi xulosasi asosida beriladi.
Taxtako‘pirda Shinjon tajribasi asosida ozuqa yetishtirish yo‘lga qo‘yiladi.
Mo‘g‘uliston, Turkiya, Xitoy va Avstraliyadan 5 ming bosh qo‘y-echki olib kelinib, Qoraqalpog‘iston sharoitida ko‘paytiriladi. Buning uchun bir oyda 1 ming gektar yer ajratish topshirildi.
Yil oxirigacha 10-15 ming gektarda loyihalar shakllantirilib, bir yil ichida 100 ming bosh qo‘y-echki boqishni yo‘lga qo‘yish vazifasi belgilandi.
Prezidentimiz kecha «Kegeyli naslli parranda» korxonasi faoliyati bilan tanishganini qayd etdi.
Tadbirkorni qo‘llab-quvvatlab, bir yil ichida parranda yetishtirish quvvatini 2-3 karra oshirish va korxonani xoldingga aylantirish topshirildi. Zarur mablag‘ masalasi hal qilinadi.
Kegeylidagi texnikumda parranda yetishtirishni o‘rgatadigan kurslar tashkil etiladi.