18−22-oktabr kunlari Samarqandga kirish va ayrim ko‘chalarda harakatlanish vaqtincha cheklanadi
18−22-oktabr kunlari Samarqandga kirish va shaharning qator ko‘chalarda transport harakati vaqti-vaqti bilan cheklanadi. Bunga shaharda 'S5+1' formatidagi TIV rahbarlari uchrashuvi va Bolalar farovonligi bo‘yicha butunjahon sammiti o‘tkazilishi munosabati bilan xavfsizlik choralari kuchaytirilishi sabab bo‘lmoqda.
18−22-oktabr kunlari Samarqandga kirish hamda ayrim ko‘chalarda harakatlanish vaqtincha cheklanadi
Samarqand shahrida xalqaro tadbirlar o‘tkazilishi sababli shaharga kirish yo‘llari va bir qator markaziy ko‘chalarda transport harakati vaqti-vaqti bilan cheklanadi, deya xabar bermoqda Ichki ishlar vazirligi.
19−20-oktabr kunlari shahar “S5+1” formatidagi Markaziy Osiyo mamlakatlari va AQSh tashqi ishlar vazirlari uchrashuviga, 21−22-oktabr kunlari esa bolalar farovonligi va kelajagiga bag‘ishlangan butunjahon sammitiga mezbonlik qiladi.
Xususan, 18−22-oktabr kunlari shaharning Ibn Sino, Bo‘stonsaroy, Universitet xiyoboni, Registon, Afrosiyob, Namozgoh, Sadriddin Ayniy, Shohbot, Usta Umar Jo‘raqulov, Shohizinda, Mirzo Ulug‘bek, Beruniy, Dag‘bit, Ro‘dakiy, Go‘lobod, Oydin yo‘li ko‘chalarida harakatlanish cheklanib, haydovchilar uchun aylanma yo‘llar orqali harakatlanish tashkil etiladi.
Istisno tariqasida faqat tezkor xizmatlarning maxsus avtotransport vositalariga harakatlanishga ruxsat beriladi. Samarqand viloyati hududidan tranzit o‘tuvchi transport vositalari uchun ham aylanma harakat yo‘nalishlari belgilangan.
Haydovchilar va shahar mehmonlaridan vaqtinchalik noqulayliklarni to‘g‘ri tushungan holda, yo‘llarda xavfsizlikni ta’minlayotgan mas’ul xodimlarning talablariga rioya qilishlari so‘ralmoqda.