Yaqin Sharqdagi AQSH harbiylarining telefonlari olib qo‘yilishi mumkin
Yaqin Sharqdagi AQSH harbiylarining telefonlari olib qo‘yilishi mumkinligi haqida ogohlantirish berildi. Bu haqda AQSHning mintaqadagi bosh qo‘mondoni ma’lum qildi. Uning so‘zlariga ko‘ra, internetda tarqalgan videolar Eron uchun nishonlarni aniqlashda yordam berishi mumkin. Reuters manbalariga ko‘ra, hududdagi ayrim harbiylarning telefonlari olib qo‘yilishi ehtimoli bor.
Aloqa vositalariga cheklov qo‘yilishi harbiylar uchun yangi qiyinchilik tug‘diradi, chunki ularning ko‘pchiligi oilasi bilan bog‘lanish uchun telefonlardan foydalanadi. AQSH Markaziy qo‘mondonligi rahbari, admiral Bred Kuper 28-iyul kuni harbiylarga yo‘llagan maktubida Eron matbuot va ijtimoiy tarmoqlardagi harbiylarning videolari orqali o‘z zarbalari oqibatini real vaqt rejimida kuzatib borayotganini ta’kidladi.
Kuper o‘z maktubida shunday yozgan: “Ochiq manbalardagi ma’lumotlar amerikalik harbiylar va Ko‘rfaz davlatlaridagi tinch aholi hayotiga zomin bo‘lishi mumkin”.
Bosh qo‘mondon harbiylarni operativ xavfsizlikka e’tiborni kuchaytirishga chaqirdi. Iordaniyadagi manbalarga ko‘ra, u yerdagi ayrim harbiylarga yaqin kunlarda telefonlari olib qo‘yilishi aytilgan. Central Command vakili Timoti Hokins esa bu xabar harbiylarga xavfsizlik qoidalarini eslatish uchun yuborilganini bildirdi.
**Meta ko‘zoynaklari va kiberxavf**
17-iyul kuni Iordaniyadagi Muvaffaq Salti aviabazasiga Eron hujumi vaqtida bir harbiy bunkerga qochayotganini videoga olgan. Kuperning aytishicha, bu video tasvirga oluvchi kamerasi bor Meta aqlli ko‘zoynaklari orqali yozib olingan va Instagram’ga joylashtirilgan.
Kuperning tushuntirishicha, Eron o‘z raketasi mo‘ljalga teggani yoki yo‘qligini bilolmaydi. Ammo internetdagi videolar va ommaviy axborot vositalaridagi batafsil tahlillar Eron uchun zarbalar natijasini tekinga baholab bermoqda. Ushbu ma’lumotlar Eronga takror va yanada kuchliroq zarba berishga imkon yaratadi.
**Hujumlar oqibati va xavotirlar**
28-fevralda boshlangan urush davomida 18 nafar amerikalik harbiy halok bo‘lgan, 600 dan ortig‘i yaralangan. Ayni paytda, AQSH aholisining bor-yo‘g‘i uchdan bir qismi bu urushni qo‘llab-quvvatlamoqda.
Demokratik qonun chiqaruvchilar urush haqida, jumladan, baza infratuzilmalari zarari va Erondagi qizlar maktabiga berilgan zarba surishtiruvi bo‘yicha ko‘proq ma’lumot berishni talab qilmoqda. Harbiylarning telefonlari olib qo‘yilishi mumkinligi haqidagi xabarlar ularning yaqinlari orasida xavotirni oshirgan.
Mutaxassislar bir necha yildan beri telefondagi ilovalar va joylashuv ma’lumotlari dushmanlar uchun qurol bo‘lishi mumkinligidan ogohlantirib keladi. May oyida ham smartfonlardan olingan joylashuv ma’lumotlari harbiylarni kuzatish uchun ishlatilgani xabar qilingan edi. Ayni paytda, AQSH Eronga quruqlikdan bostirib kirmoqchi ekani haqida xabarlar tarqalmoqda.