Xitoyda xorijliklarni kuzatuvchi ochiq politsiya platformasi aniqlandi
Xitoyda chet elliklarni kuzatishga mo‘ljallangan ochiq politsiya platformasi topildi. Kiberxavfsizlik bo‘yicha tadqiqotchi va jurnalist Mark Hofer tasodifan Xitoy politsiyasining ochiq platformasini aniqladi. Unda Xitoyda yashovchi yoki mamlakatga tashrif buyurgan minglab chet elliklarning shaxsiy ma’lumotlari saqlangan.
The New York Times nashrining yozishicha, bu holat Xitoy hukumatining nafaqat o‘z fuqarolari, balki xorijliklarni ham raqamli kuzatish ko‘lami qanchalik keng ekanligini ko‘rsatadi. Nashr ma’lumotlariga ko‘ra, 2026-yil boshida Hofer tarmoqni odatiy monitoring qilish jarayonida "Chet elliklarni dinamik monitoring qilish platformasi" deb nomlangan servisga duch kelgan.
Ushbu tizim Chjanjiakou shahriga tegishli bo‘lib, unda deyarli 12 ming kishining ma’lumotlari mavjud. Bular orasida xorijliklar, jurnalistlar, Gonkong va Tayvan aholisi, shuningdek, "yuqori xavf" guruhiga kiritilgan shaxslar bor.
Jurnalistni eng ko‘p hayratga solgan narsa bazada o‘zining ham profili borligi bo‘ldi. Unda Xitoy immigratsiya xizmati tomonidan olingan fotosurat, pasport raqami va mobil telefon raqami joylashtirilgan.
Platformada oddiy migratsiya qaydlaridan ko‘ra ancha ko‘proq ma’lumot saqlangan. Undan pasport ma’lumotlari, manzillar, oilaviy ahvoli, ish joyi, samolyot va poyezd chiptalari, kasalxonaga tashriflar, yonilg‘i to‘lovlari va hatto kuzatuv kameralari hamda yuzni tanish tizimlari qayd etgan harakatlar o‘rin olgan.
Saqlangan ma’lumotlarni tahlil qilgach, jurnalistlar ushbu baza Xitoy hukumatining xorijliklarning xatti-harakatlarini to‘liq nazorat qilish uchun videokameralar, tibbiy yozuvlar, davlat reyestrlari va boshqa manbalardan olingan axborotlarni qanday birlashtirishini ko‘rsatadi, degan xulosaga kelishdi.
Platformaning amalda mutlaqo himoyalanmagani alohida xavotir uyg‘otadi. Kiberxavfsizlik bo‘yicha tadqiqotchi Greg Uoltonning so‘zlariga ko‘ra, bu Xitoy raqamli kuzatuv infratuzilmasining juda tez o‘sayotgani natijasidir.
Avvalroq AQSH hukumati sun’iy intellekt sohasini va milliy xavfsizlikni kiberhujumlardan himoya qilish maqsadida Xitoyning gumanoid robotlari hamda invertorlarini taqiqlagandi.