Ukraina Turkiyadan ATACMS raketalari va boshqa qurollarni sotib olmoqchi
Ukraina Turkiyadan ATACMS raketalari va boshqa turdagi qurollarni xarid qilish niyatida.
Ukraina Turkiyadan 70 dona AQSHda ishlab chiqarilgan M39 ATACMS ballistik raketasi, 12 dona M270 MLRS raketa tizimi va minglab artilleriya o‘q-dorilarini sotib olmoqda. Bu haqda Ukrainaning “Militarnyi” portali AQSH Davlat departamentining Kongressga taqdim etgan rasmiy bayonotiga tayanib xabar berdi.
Kelishuvga ko‘ra, Ukrainaga quyidagi qurol-yarog‘lar yetkazilishi rejalashtirilgan:
* 70 dona M39 ATACMS ballistik raketasi;
* 12 dona M270 MLRS raketa tizimi;
* 2 524 dona M26 rusumli 227 millimetrli boshqarilmaydigan reaktiv snaryad;
* 47 000 dona M509A1 rusumli 203 millimetrli kassetali artilleriya snaryadi.
Ushbu snaryadlar, xususan, 2S7 “Pion” va M110 o‘ziyurar artilleriya qurilmalarida qo‘llaniladi.
**AQSH Ukrainaga qurol yetkazilishiga ruxsat berishi shart**
Turkiya AQSHda ishlab chiqarilgan qurollarni uchinchi davlatga faqat Vashingtonning rasmiy roziligi bilan yetkazib bera oladi.
AQSH Davlat departamenti bunday reeksportni ma’qullashga tayyorligini bildirgan. Qonunchilikka ko‘ra, AQSH Kongressida Davlat departamentining tegishli bildirishnomasini ko‘rib chiqish uchun 15 kunlik muddat mavjud.
Agar shu muddat ichida Kongressning har ikki palatasi yetkazib berishni taqiqlash bo‘yicha qo‘shma rezolyutsiya qabul qilmasa, AQSH hukumatining roziligi avtomatik ravishda kuchga kiradi.
Ayni paytda Vakillar palatasi 31-avgustgacha, Senat esa 14-sentyabrgacha ta’tilda.
**Turkiya eski qurol zaxiralarini kamaytirmoqchi**
Xabarlarga ko‘ra, Turkiya eskirgan qurol-yarog‘ zaxiralarini qisqartirib, mavjud tizimlarni modernizatsiya qilish va ulardan foydalanishni davom ettirishga e’tibor qaratmoqchi.
Ukraina uchun esa xarid qilinayotgan qurol va o‘q-dorilar Rossiya bilan urushda mudofaa salohiyatini kuchaytirishga xizmat qiladi.
Qurol-yarog‘larni yetkazib berish jarayonida Turkiya, Bolgariya va AQSHning mudofaa hamda logistika kompaniyalari ishtirok etishi kutilmoqda.
**Ukraina qanday ATACMS raketalarini oladi?**
Ukraina sotib olayotgan M39 ATACMS raketasi ushbu raketa oilasining dastlabki modifikatsiyalaridan biri hisoblanadi. Uning uchish masofasi 165 kilometrgacha yetadi.
Raketa GPS orqali tuzatib borilmaydigan avtonom inertial boshqaruv tizimiga ega.
M39 raketasi og‘irligi 560 kilogramm bo‘lgan kassetali kallakka ega bo‘lib, uning tarkibida 950 dona M74 parchalanuvchi subo‘q-dorisi mavjud. Ular tirik kuch, zirhsiz texnika, havo mudofaasi vositalari va yer ustidagi boshqa nishonlarni yo‘q qilish uchun mo‘ljallangan.
Reuters manbalariga ko‘ra, AQSHning Eron bilan urushi davomida Vashington ATACMS raketalari ham kiruvchi “yer-yer” toifasidagi uzoq masofali raketalar zaxirasining deyarli barchasini sarflab bo‘lgan.
Agentlik ma’lumotiga ko‘ra, bu holat AQSH prezidenti Donald Trampning noroziligiga sabab bo‘lgan. U AQSH mudofaa vaziri Pit Hegsetdan raketalar zaxirasi nega bunday darajada kamayib ketganiga izoh talab qilgan.
Avvalroq Finlyandiya Ukrainaga Patriot raketalarini berishdan bosh tortgan edi. Mudofaa vaziri mamlakat Ukrainaga imkon qadar ko‘p yordam ko‘rsatganini, biroq o‘z havo mudofaasi va jangovar shayligini xavf ostiga qo‘yishi mumkin emasligini bildirgan.