Suv xo‘jaligida 2030-yilgacha qanday strategik qadamlar qo‘yiladi?

Suv xo‘jaligida 2030-yilgacha qanday strategik qadamlar qo‘yiladi?

Hozirgi global iqlim o‘zgarishlari davrida suv resurslarini boshqarish va ulardan oqilona foydalanish har qachongidan ham dolzarb ahamiyat kasb etmoqda. Bu jarayonda nafaqat zamonaviy infratuzilma, balki sohaning bilimdon mutaxassislari va ilmiy asoslangan uzoq muddatli strategiyalar hal qiluvchi rol o‘ynaydi. O‘zbekiston Respublikasi Prezidentining "Ichimlik suvi ta’minoti va oqova suv tizimini yanada yaxshilashga qaratilgan qo‘shimcha chora-tadbirlar to‘g‘risida"gi Farmoni aynan shu strategik vazifalar ijrosini ta’minlashga qaratilgani bilan beqiyos ahamiyatga ega.

Sohadagi kadrlar salohiyatini sifat jihatidan yangi bosqichga ko‘tarish maqsadida ta’lim jarayonlarini zamon talablariga moslashtirish boshlab yuborildi. Bu borada quyidagi muhim qadamlar belgilangan:

Birinchidan, 2027/2028-o‘quv yilidan boshlab "TIQXMMI" milliy tadqiqot universiteti negizida nazariya va amaliyotni uzviy bog‘laydigan maxsus dual ta’lim shaklidagi fakultet o‘z faoliyatini boshlaydi. Bu oliy ta’lim va ishlab chiqarish integratsiyasini yangi bosqichga ko‘taradi.

Ikkinchidan, respublikaning har bir hududidagi bittadan texnikumda ichimlik va oqova suv yo‘nalishi bo‘yicha dual ta’lim tizimi joriy etilib, joylardagi amaliy ko‘nikmaga ega kadrlarga bo‘lgan ehtiyoj to‘liq qondiriladi.

Qabul qilingan hujjat faqat joriy muammolarni hal qilish bilan cheklanib qolmay, kelajakni oldindan ko‘ruvchi uzoq muddatli rejalarni ham o‘z ichiga oladi. 2026-yil yakuniga qadar iqlim o‘zgarishiga barqaror infratuzilmani rivojlantirish hamda sohaga ilg‘or texnologik yechimlarni keng joriy etishni nazarda tutuvchi maxsus Strategiya ishlab chiqiladi.

Bu strategik hujjat suv inshootlarining avariyalarsiz, yuqori samaradorlik va sifat bilan ishlashini kafolatlaydi. Sohaga zamonaviy bilimga ega, amaliyotni puxta egallagan yosh mutaxassislarning kirib kelishi esa ertangi kun barqarorligining tamal toshidir. 2030-yilgacha mo‘ljallangan strategiyaning izchil amalga oshirilishi iqlim o‘zgarishi sharoitida aholini kafolatli toza suv bilan ta’minlash, fuqarolar salomatligini muhofaza qilish hamda bebaho tabiiy resursni kelajak avlodlarga bekamu ko‘st yetkazib berishda hal qiluvchi omil bo‘lib xizmat qiladi.