Superliga. “Andijon” o‘z maydonida “Paxtakor” bilan durang o‘ynadi

Superliga. "Andijon" o'z uyida "Paxtakor" bilan durang o'ynadi

O'zbekiston Superligasining 15-turidan o'rin olgan dastlabki bahs yakunlandi. Unda "Andijon" o'z maydonida poytaxtning "Paxtakor" jamoasini qabul qilib, golsiz durang qayd etdi.

Andijondagi "Bobur arena" stadionida bo'lib o'tgan o'yin keskin kurashlarga boy bo'ldi. Har ikki jamoa vakillari hisobni ochish uchun bir qator xavfli hujumlar uyushtirgan bo'lsa-da, ularga hujumlarni yakunlashda aniqlik va omad yetishmadi.

Uchrashuvning so'nggi daqiqalari o'ta asabiy ruhda o'tdi va hakam cho'ntagidan ketma-ket qizil kartochkalar chiqishiga sabab bo'ldi. Dastlab, 80-daqiqada "Andijon" a'zosi Nemaniya Chalasan maydondan chetlatildi. Qolgan daqiqalarda son jihatdan ustunlikka ega bo'lgan toshkentliklar bu imkoniyatdan foydalana olishmadi. Aksincha, hakam tomonidan qo'shib berilgan vaqtda (90+3-daqiqada) mezbonlar tarkibidan Martin Buakye, "Paxtakor"dan esa Muhammadrasul Abdumajidov qizil kartochka olib, maydonni erta tark etishga majbur bo'ldi. Yakunda tabloda 0:0 hisobi o'zgarmay qoldi.

Ushbu durang natijadan so'ng har ikki jamoa o'z hisobiga bittadan ochko yozdirib qo'ydi. Safardan durang bilan qaytgan "Paxtakor" ochkolari sonini 34 taga yetkazdi va turnir jadvalida 35 ochko bilan peshqadamlik qilayotgan "Neftchi"ni ta'qib qilishda davom etgan holda 2-pog'onani band etib turibdi. O'z uyida bir ochkoga ega chiqqan "Andijon" esa jami ochkolarini 21 taga yetkazib, jadvalning 8-o'rniga joylashdi.

O'zbekiston Superligasi, 15-tur

"Andijon" — "Paxtakor" 0:0

Chetlatishlar: Nemaniya Chalasan (80, "Andijon"), Martin Buakye (90+3, "Andijon"), Muhammadrasul Abdumajidov (90+3, "Paxtakor")