Sport maktablarida iхtisoslashuv joriy etiladi, murabbiylar esa ommaviy sport uchun ragʻbatlantiriladi
Vazirlar Mahkamasining 407-sonli qarorida maktablarni sport turlariga iхtisoslashtirish, oʻzini oʻzi band qilgan murabbiylarni qoʻllab-quvvatlashni kengaytirish, yangi oylik ustamalarni joriy etish va aholi punktlarida sport klublarini rivojlantirish uchun ragʻbatlantirish choralarini koʻrish nazarda tutilgan.
Sport maktablarida ixtisoslashuv joriy etilib, murabbiylar ommaviy sportni rivojlantirish uchun ragʻbatlantiriladi.
Vazirlar Mahkamasining 2026-yil 24-iyuldagi 407-sonli "Sport maktablari faoliyatini tizimli tashkil etishga doir qoʻshimcha chora-tadbirlar toʻgʻrisida"gi qarori qabul qilindi.
Prezidentning 2024-yil 18-dekabrdagi PQ-443-sonli qaroriga muvofiq, ushbu hujjatda quyidagilar koʻzda tutilgan:
* Hududlarning oʻziga xos xususiyatlari, aholining qiziqishlari, shuningdek, erishilgan sport natijalari va mavjud sport infratuzilmasini inobatga olgan holda sport maktablarini sport turlari boʻyicha ixtisoslashtirishni joriy etish.
* Sport maktablari tarkibida ommaviy sport turlari boʻyicha trener-tanlovchi lavozimini kiritish.
Bundan tashqari, aholi punktlarida sport klublarini tashkil etgan murabbiylarga oʻzlari shugʻullanayotgan sportchilarni "ERP sport" yagona elektron boshqaruv tizimida roʻyxatdan oʻtkazish imkoniyati beriladi. Bunda:
* Oʻzini oʻzi band qilish huquqi beriladi.
* Murabbiylar oʻz hududidagi sport maktabiga biriktiriladi.
Shu bilan birga, sport maktabiga tegishli moliya yiliga ajratilgan mablagʻlar doirasida ijtimoiy majburiyatlarni bajarganligi uchun trenerlarni ragʻbatlantirish tizimi joriy etiladi.
2026-yil 1-sentyabrdan boshlab sport maktablari xodimlariga ommaviy sport tadbirlari ishtirokchilarini rivojlantirish va saralash ishlari hamda sport natijalari uchun bazaviy ish haqiga har oylik qoʻshimcha ustamalar toʻlanadi.
Sport maktabi qoshida faoliyat yuritayotgan oʻzini oʻzi band qilgan trenerlarga tegishli moliya yiliga sport maktabiga ajratilgan mablagʻlar doirasida ijtimoiy majburiyatlarni bajarish sharti bilan sport maktablari trenerlari uchun belgilangan bazaviy stavka miqdorida ishlash tavsiya etiladi.
Hujjat bilan quyidagilar tasdiqlandi:
* Ommaviy sportni rivojlantirish borasidagi ishlari va sport natijalari uchun sport maktablari xodimlarining bazaviy ish haqiga har oyda toʻlanadigan mukofotlar miqdori.
* Oʻzini oʻzi band qilgan trenerlarni sport maktabiga biriktirish va ularni aholi punktlarida sport klublarini tashkil etishga ragʻbatlantirish tartibi toʻgʻrisidagi nizom.
Hujjat Qonun hujjatlari ma’lumotlari milliy bazasida e’lon qilingan va 2026-yil 27-iyuldan kuchga kirdi.
Lola Abduazimova