Shavkat Mirziyoyev to‘qqiz davlatning yangi elchilarini qabul qildi
O‘zbekiston prezidenti Shavkat Mirziyoyev Italiya, Falastin, Saudiya Arabistoni, Kuvayt, Jazoir, Malayziya, Pokiston, Ozarboyjon va Qozog‘istonning mamlakatga yangi tayinlangan favqulodda va muxtor elchilaridan ishonch yorliqlarini qabul qildi. Marosimda davlat rahbari har bir mamlakat bilan siyosiy, savdo-iqtisodiy va investitsiyaviy hamkorlikni yanada kengaytirishning ustuvor yo‘nalishlarini belgilab berdi.
Shavkat Mirziyoyev to‘qqiz mamlakatning yangi elchilarini qabul qildi.
28-iyul kuni bo‘lib o‘tgan tantanali marosimda Prezident Shavkat Mirziyoyev diplomatik missiyalar rahbarlarini Yangi O‘zbekistondagi faoliyatining boshlanishi bilan tabrikladi. U bugungi murakkab geosiyosiy vaziyatda diplomatlarning mas’uliyati har qachongidan ham muhimligini ta’kidladi.
Davlat rahbari har bir elchiga murojaat qilib, ular vakillik qilayotgan mamlakatlar bilan hamkorlikni yanada rivojlantirish bo‘yicha ustuvor vazifalarni sanab o‘tdi. Xususan, Italiya bilan "yashil" energetika va ta’lim sohasidagi hamkorlik, Saudiya Arabistoni bilan 25 milliard dollarlik loyihalar portfeli, Quvayt bilan investitsiya va infratuzilma loyihalari, Jazoir bilan neft-gaz va qishloq xo‘jaligi sohasidagi hamkorlik, Malayziya bilan yarimo‘tkazgichlar va islom moliyasi, Pokiston bilan Transafg‘on transport yo‘lagi, Ozarbayjon bilan investitsiya portfelini 10 milliard dollarga yetkazish hamda Qozog‘iston bilan o‘zaro savdo hajmini 10 milliard dollarga yetkazish rejalari alohida qayd etildi.
Marosim yakunida Prezident yangi tayinlangan elchilarga diplomatik faoliyatida muvaffaqiyatlar tilab, ularni O‘zbekiston hududlari va xususiy sektori bilan faol hamkorlik qilishga chaqirdi. Elchilar esa mamlakat bilan ko‘p qirrali hamkorlikni yanada rivojlantirish uchun barcha imkoniyatlarini ishga solishlarini bildirdilar.