Ramazon Temirov va Bogdan Guskov UFC Fight Night 282 qancha ishlab topgani ma’lum bo‘ldi
**Ramazon Temirov va Bogdan Guskov UFC Fight Night 282 turnirida qancha daromad olgani ma’lum bo‘ldi**
Birlashgan Arab Amirliklarining Abu-Dabi shahrida bo‘lib o‘tgan UFC Fight Night 282 musobaqasida ishtirok etgan jangchilarning kafolatlangan gonorarlari oshkor etildi. Ushbu turnirda qatnashgan o‘zbekistonlik sportchilar o‘z chiqishlari evaziga sezilarli miqdordagi mablag‘larni qo‘lga kiritishdi.
Turnirning asosiy jangida rossiyalik sobiq UFC chempioni Magomed Ankalayevga qarshi oktagonga chiqqan o‘zbekistonlik jangchi Bogdan Guskov 381 ming dollar miqdorida kafolatlangan gonorar oldi. Ma’lumotlarga ko‘ra, Bogdan ushbu jangga atigi 10 kun qolganida rozi bo‘lgan va munosib qarshilik ko‘rsatganiga qaramay, beshinchi raundda texnik nokaut bilan mag‘lubiyatga uchragan edi. Uning raqibi Ankalayev esa bu jangdan 591 ming dollar ishlab oldi.
Kechaning ikkinchi muhim jangida o‘zbekistonlik aralash yakkakurash ustasi Ramazon Temirov o‘z vazn toifasida reytingning 13-pog‘onasida joylashgan Stiv Ersegni birinchi raunddayoq dahshatli nokautga uchratdi. Ushbu yorqin g‘alabasi uchun Ramazon 136 ming dollar kafolatlangan gonorarga ega bo‘ldi.
Bundan tashqari, Temirov turnirdagi yagona nokautni qayd etgani uchun tashkilot tomonidan qo‘shimcha 100 ming dollar bonus bilan ham taqdirlandi. Shu tariqa, Temirov UFC’dagi o‘zining uchinchi jangidan jami 236 ming dollar daromad oldi.
UFC Fight Night 282 turniri ishtirokchilarining to‘liq gonorarlari quyidagicha:
* Magomed Ankalayev — 591 000 dollar
* Bogdan Guskov — 381 000 dollar
* Santyago Ponzinibbio — 271 000 dollar
* Dastin Jeykobi — 266 000 dollar
* Valter Uoker — 178 000 dollar
* Ramazon Temirov — 136 000 dollar
* Rizvan Kuniyev — 136 000 dollar
* Tayrell Forchun — 118 000 dollar
* Stiv Erseg — 91 000 dollar
* Mayk Devis — 81 000 dollar
* Nurullo Aliyev — 54 500 dollar
* Muhammad Saidov — 53 000 dollar
* Magomed Zaynukov — 28 000 dollar
* Magomed Tuchalov — 28 000 dollar
* Abubakar Vagayev — 28 000 dollar
* Saygid Izagaxmayev — 18 000 dollar
* Damian Rjepeski — 16 000 dollar