Qirg‘iziston benzin va dizel eksportiga muddatsiz taqiq joriy etdi

Qirg‘iziston benzin va dizel eksportiga cheklovlar kiritdi

Qirg‘iziston Vazirlar Mahkamasi mamlakatdan neft va neft mahsulotlarini eksport qilishga cheklovlar joriy etganini 24.kg xabar bermoqda. Ushbu taqiq ichki bozor to‘yingunga qadar yoki Yevroosiyo iqtisodiy ittifoqining (YeOII) neft va neft mahsulotlari yagona bozori shakllangunga qadar davom etadi.

Cheklovlar neft, benzin, dizel yonilg‘isi va boshqa neft mahsulotlarini avtomobil va temiryo‘l transporti orqali olib chiqishga taalluqlidir.

Biroq, nafta, mazut va pech yoqilg‘isi istisno qilingan. Ularni xorijda qayta ishlash uchun hukumatning alohida qarori bilan, lekin tayyor mahsulotni Qirg‘izistonga majburiy qaytarish sharti bilan olib chiqish mumkin.

Cheklovlar, shuningdek, chegarani kesib o‘tayotgan avtomobillarning standart baklaridagi yonilg‘iga nisbatan tatbiq etilmaydi.

Bundan tashqari, Qirg‘iziston Vazirlar Mahkamasi mamlakat hududiga ayrim turdagi neft va neft mahsulotlarini avtomobil transportida olib kirishga qo‘yilgan vaqtinchalik taqiqning amal qilishini 2027-yil 1-aprelga qadar to‘xtatib turdi.

Ushbu o‘zgarishlar yonilg‘i tanqisligining oldini olish, mamlakat energetika xavfsizligini himoya qilish va ichki ehtiyojlarni uzluksiz qondirish maqsadida qabul qilindi, deyiladi qarorda.

Avvalroq Qirg‘iziston yonilg‘i yetkazib berishda barqarorlikni saqlab qolish maqsadida O‘zbekiston, Rossiya, Qozog‘iston va boshqa davlatlarga murojaat qilgandi. Energetika vazirligi zaxiralar yetarli ekanini ta’kidlagan, ammo dunyodagi vaziyatning ta’sirini tan olgan. Yanvar-aprel oylarida benzin importi 20 foizga kamaygan.

Shuningdek, Qozog‘iston yonilg‘ining noqonuniy olib chiqib ketilishiga qarshi kurash doirasida chegaradosh davlatlardan transport vositalarining kirib-chiqish davriyligini cheklagandi.