Qashqadaryoda ham jazirama sabab og‘ir yuk avtomobillari harakati vaqtincha cheklanadi.

Qashqadaryoda jazirama sababli og‘ir yuk avtomobillari harakati vaqtincha cheklanadi. Anomal issiq sharoitlari natijasida Qashqadaryo viloyatida ham og‘ir yuk mashinalarining harakati vaqtincha to‘xtatiladi. Viloyat hokimligi tomonidan berilgan ma’lumotga ko‘ra, Qarshi shahri, tuman markazlari va ularni bog‘lovchi umumiy foydalanishdagi avtomobil yo‘llarida og‘ir yuk mashinalarining harakati har kuni soat 09:00 dan 19:00 gacha cheklanadi.

Gidrometeorologiya xizmati ma’lumotlariga ko‘ra, viloyatda kunduzi havo harorati +42...+44 darajagacha, ayrim joylarda esa undan ham yuqori bo‘lishi kutilmoqda. Bunday sharoitda asfalt-beton qoplamasi harorati +70...+75 darajagacha ko‘tarilib, yo‘llarning yuk ko‘tarish qobiliyati pasayadi. Natijada og‘ir yuk avtomobillari harakati yo‘l qoplamasida g‘ildirak izlari, deformatsiyalar va boshqa texnik nuqsonlar paydo bo‘lishiga olib kelishi mumkin.

Shu sababli, davlat budjeti va xalqaro moliya institutlari mablag‘lari hisobidan qurilgan va ta’mirlangan avtomobil yo‘llarini saqlash maqsadida Qarshi shahri, tuman markazlari va ularni bog‘lovchi umumiy foydalanishdagi avtomobil yo‘llarida og‘ir yuk avtomobillarining harakati har kuni soat 09:00 dan 19:00 gacha vaqtincha cheklanadi.

Mas’ullar haydovchilar va yuk tashuvchi korxona va tashkilotlardan mazkur cheklovlarga qat’iy rioya qilishni, yuk tashish vaqtlarini belgilangan tartib asosida rejalashtirishni so‘rashdi. Viloyat hokimligiga ko‘ra, ushbu choralar yo‘l infratuzilmasini asrash, harakat xavfsizligini ta’minlash va avtomobil yo‘llarining xizmat muddatini uzaytirishga qaratilgan.

Bundan oldin Surxondaryo viloyatida kuchli issiq sababli og‘ir yuk avtomobillari harakati vaqtincha cheklangan edi.